Лидерот на СДСМ Бранко Црвенковски најави дека опозициската коалиција „Сојуз на иднината“ преминува на поинаков начин на дејствување, како што рече, соодветен на приликите и карактерот на овој режим. СДСМ, секој ден до петок, ќе организира полчасовни блокади на клучните сообраќајници во сите градови во Македонија, а в сабота напладне ќе протестира пред седиштето на владејачката ВМРО-ДПМНЕ во Скопје. Црвенковски најави дека ќе организираат и поддржуваат секаков облик на граѓански отпор и непослушност и дека ќе организираат и поддржуваат секаков вид на митинзи, протести и блокади на сообраќајници. Крајната цел е враќање на уставниот поредок и демократијата во Македонија, а за тоа да се случи, рече Црвенковски, овој тоталитарен режим ќе мора да си замине.