Во Швајцарија денеска се одржува референдум на кој гласачите се изјаснуваат за тоа дали да се забрани пушењето на сите јавни места и во затворени работни простории. Според последните анкети на јавното мислење, околу 52 проценти се противат на оваа мерка, додека 41 отсто го поддржуваат, а 7 отсто се неопределени. Референдумот е наменет за зајакнување на законот усвоен во 2010 година, со кој исто така се забранува пушење на јавни места. Но тој закон овозможува бројни исклучоци и е различно имплементиран во различни швајцарски кантони.
