Архивска фотографија. Протестен митинг на СДСМ во Скопје.
СДСМ на улица ќе се пресметува со власта. За власта тоа се неуспешни фрази без суштина, граѓаните се скептични дека со протестите нешто ќе се смени, а експертите велат дека протестите може да имаат одреден ефект.
Социјалдемократите со протест во Струмица ја започнаа нивната битка со власта. Со посета на градови и села низ земјава тие летово ќе го посветат на лоцирање на проблемите на граѓаните и на нивно решавање. Од ВМРО-ДПМНЕ реагираа дека од СДСМ не понудиле ништо ново, туку истите фрази во кои нема никаква суштина, предлог и идеја.
Присуството на огромен број граѓани во Струмица, преку 10 илјади, ни покажа дека граѓаните бараат такво собирање, бараат место каде што ќе можат да си го кажат гласот, да го кренат гласот против постоечките состојби во Република Македонија и каде што ќе можат да го видат раководството на СДСМ како и кандидатите што ние ги нудиме за идни градоначалници во тие општини.
Ана Павловска Данева, СДСМ.
Ана Павловска Данева од СДСМ вели дека нема потреба да ги коментираат реакциите на нивните противници. Тие се задоволни од приемот на граѓаните и планираат да продолжат со исто темпо.
„Присуството на огромен број граѓани во Струмица, преку 10 илјади, ни покажа дека граѓаните бараат такво собирање, бараат место каде што ќе можат да си го кажат гласот, да го кренат гласот против постоечките состојби во Република Македонија и каде што ќе можат да го видат раководството на СДСМ, како и кандидатите што ние ги нудиме за идни градоначалници во тие општини.“
Граѓаните што ги анкетиравме за рубриката Хајд Парк на нашата веб страна се скептични дека СДСМ на еден ваков начин ќе може да и се спротивстави на власта.
„Ќе имаат ефект кај младата генерација што не ги знае постапките на СДСМ од 1991 до смената на власта.“
„Треба да се пробаат сите демократски начини, така да и тоа не е лошо.“
„Мислам дека нема многу да допринесе, освен да покаже масовност.“
Вашиот пребарувач не подржува HTML5
Хајд Парк - Има ли ефект од протестите на СДСМ
Професор Здравко Савески вели дека директното информирање на граѓаните за сопствените позиции секогаш има одреден ефект, а бидејќи опозицијата не располага со доволен медиумски простор, еден од начините да се наметне е одржување на протести.
„Овој начин со одржување на митинзи има два ефекти, прво да ги охрабри своите членови, а исто така и да ги информира останатите граѓани за сопствените партиски позиции и за сопствените решенија.“
Савески додава дека еден од главните проблеми кои опозицијата мора да го надмине е недовербата кај неопределните граѓани кон работата на СДСМ додека била на власт.
„Тоа им е една голема бариера, голема препрека за придобивање на неопределните граѓани и тие сериозно треба да поработат на промена на таа своја слабост ако сакаат посериозно да ја загрозат владеачката партија.“
Следната станица на СДСМ во наредниот викенд ќе биде Велес.
