Грчките политички лидери започнаа нова рунда разговори за формирање влада, во услови кога земјата запаѓа во подлабока криза по одржаните избори. Претседателот Карлос Папуљас е на средба со лидерите на петте политички партии со кои разговара за формирање на технократска влада. Претходните напори за формирање на коалициска влада беа неуспешни по изборите на 6 мај. Ниту една политичка партија не доби потребно мнозинство гласови а лидерите не можат да постигнат согласност за коалицирање поради мерките за штедење, кои се предуслов за добивање на пакет помош од Европската унија и Меѓународниот монетарен фонд, се` со цел да се избегне банкрот. Ако преговорите не успеат, се очекуваат нови избори.