Иранските новински агенции јавија дека во денешниот бомбашки напад во Техеран бил убиен универзитетскиот професор Мустафа Ахмади Рошан, кој работел во нуклеарната постројка Натанц. Според очевидци, Рошан и уште две лица биле во автомобил во Техеран, кога напаѓач на мотор им закачил бомба со магнет. Иранската агенција ФАРС оцени дека станува збор за терористички напад, а официјални претставници на Техеран сметаат дека зад нападот стои Израел. Сличен напад, пред една година, беше извршен и врз универзитетскиот професор Масуд Али Мухамеди.