Директорот на германската медиумска групација ВАЦ, Бодо Хомбах писмено го информирал претседателот на Србија Борис Тадиќ, дека групацијата планира да ги повлече своите инвестиции од земјата и да почне да ги продава своите акции во српските фирми. ВАЦ во моментов е сопственик на 50 проценти од најстариот српски весник „Политика“, додека другите 50 отсто се во сопственост на државата. Групацијата контролира и 55 отсто од весникот „Дневник“, кој излегува во Нови Сад. Групацијата ВАЦ, која на српскиот медиумски пазар е присутна од октомври 2001 година, печати 135 илјади примероци од различни печатени изданија дневно, меѓу кои се „Политика“, „Спортски журнал“, „Дневник“ и српското издание на списанието „Ауто Билд“.