Македонскиот претседател Ѓорге Иванов престојува во прва официјална посета на Брисел по вчерашното преземање на функцијата, каде што се сретна со високиот претставник на Европската Унијата Хавиер Солана, а планирани се разговори и со белгиските власти. Го придружува и премиерот Никола Груевски, кој попладнево оствари средба со еврокомесарот за проширување Оли Рен. На средбата како што јавува МИА, премиерот му соопштил на Рен дека Македонија е подготвена да ги продолжи преговорите со цел изнаоѓање решение околу спорот за името со Грција. Груевски истакнал дека по изборите во јуни е возможно изнаоѓање на решение за името.