Во Атина денеска ќе биде погребан тинејџерот кој беше убиен од полицаец, што според оценките на светските агенции, би можело да предизвика нови безредија во Грција, која е зафатена со тридневни протести поради убиството на момчето. Илјадници демонстранти во немирите во кои се запалени и ограбени повеќе продавници во центарот на Атина, се судрија со полицијата, при што над 50 лица се повредени, а околу 150 се приведени. По синоќешната вонредна седница на владата, министерот за внатрешни работи Прокопис Павлопулос изјави дека безредијата се неприфатливи и оти владата нема да ги толерира. Владата демантира дека планира воведување вонредна состојба, а премиерот Костас Караманлис денеска за кризата ќе разговара со претседателот на државата и со партиските лидери.
