Руската Дума го прифати денеска третото, завршно читање на Законот за борба со тероризмот. Тој беше поддржан од 423 пратеници, еден гласаше против, а осум гласаа воздржано. Усвоениот текст ќе го замени актуелниот федерален закон за борба со тероризмот од 1998 година. Новиот закон попрецизно ги формулира принципите, поимите и организациските механизми за активности против терористички закани. Тој предвидува два режима на дејствување - вонредна состојба и антитерористичка операција. Специјалните служби можат да прислушуваат телефонски разговори и да ги контролираат електронските врски во областите каде што е во тек контратерористичка операција. На противвоздушната одбрана и е дозволено да соборува авиони, грабнати од терористи. Законот одредува и правни механизми кои дозволуваат при антитерористичка операција да биде користено оружје и боева техника.
