Претседателот на Соединетите држави Џорџ Буш изјави дека американските сили постигнале значителен успех од почетокот на воената интервеција во Ирак. Буш повтори дека ослободувањето на ирачкиот народ е основна причина за војна, за разлика од претходното повеќемесечно потенцирање дека е потребно да се разоружа Садам Хусеин. Обраќајќи им се на Ирачаните, Буш посочи дека Американците имаат цел да стават крај на владеењето на Хусеин. Доаѓаме да ви дадеме храна, лекови и подобар живот. Ние доаѓаме и нема да се откажаме додека не ја ослободиме вашата земја, му порача Буш на ирачкиот народ. Тој изјави дека претстојат многу опасности, но оти секој ден американските и британските сили се се поблиску до Багдад и до победата.