Тајван рано утрово (3 април) го погоди земјотрес со јачина од 7,2 степени според Рихтер. Ова е најсилниот земјотрес кој го погодил овој регион во последните 25 години.
Според противпожарната служба, најмалку седум лица загинале, околу 700 се повредени, а се стравува дека 77 лица се затрупани под урнатините.
Телевизиските станици емитуваа снимки од згради како се нишаат во густо населениот источен град Хуалиен, во близина на епицентарот на земјотресот.
Локалните медиуми јавуваат дека во зградите има заробени луѓе.
Земјотресот, кој предизвика прекин на електричната енергија во главниот град Тајпеј, се случи во 7 часот и 58 минути по локално време на длабочина од 15,5 километри од јужниот брег на Тајван, соопшти државната сеизмолошка служба.
Јапонскиот центар за земјотреси извести дека неколку мали цунами стигнале до јужната префектура Окинава и подоцна го укинале предупредувањето за плима.
Сеизмолошката агенција на Филипините исто така издаде предупредување за жителите на крајбрежните области и ги повика да се засолнат на повисоките места.
Земјотресот бил почувствуван и во Шангај, Кина, велат очевидци. Кинеските медиуми јавуваат дека се почувствувал и во Фуџоу, Ксиамен, Куанжу и Нингде во провинцијата Фуџијан.
Во Тајпеј сè уште се чувствуваат последователни потреси, најмалку 25 досега, велат жителите. Повеќе од 87000 домаќинства останаа без струја, а запрени се и брзите возови.
Државната новинска агенција соопшти дека тоа е најсилниот земјотрес од 1999 година, кога Тајван го погоди земјотрес со јачина од 7,6 степени според Рихтеровата скала во кој загинаа околу 24 000 луѓе, а уништени или оштетени се 50 000 куќи.
Земјотрес во Тајван, најсилен во последните 25 години
