Со апсењето на Србите на Косово, косовската Влада сака да ја дестабилизира ситуацијата и да ги избегне обврските што ги презеде со Охридскиот договор, изјави денеска српскиот министер за надворешни работи Ивица Дачиќ.

„Многу е јасно дека на повидок е стара ситуација и нова криза генерирана од Приштина“, рече Дачиќ.

Тој ја повика меѓународната заедница „итно да реагира“ и да изврши притисок врз властите во Приштина“ со цел да се спречи ескалација.

Видете и ова:

Експлозивна направа фрлена врз полицајци во Северна Митровица

Дачиќ ова го изјави по седницата на Бирото за координација на безбедносните служби на Србија, еден ден откако косовската полиција уапси припадник на српската заедница во Северна Митровица како дел од акцијата за борба против организираниот криминал и спречување на извршување на криминални дејствија. .

Српскиот претседател Александар Вучиќ и косовскиот премиер Албин Курти на 18 март во Охрид се договорија дека ќе продолжат со спроведувањето на европскиот план за нормализација на односите.

Европските претставници рекоа дека Охридскиот договор, иако непотпишан, е правно обврзувачки за двете страни.

• Курти – Договорот за нормализација мора брзо да се спроведе

Уапсениот припадник на српската заедница на Косово е осомничен за повеќе кривични дела, меѓу кои вмешаност во напад на единица на косовската полиција, „учество или организирање на организирана криминална група“, „убиство во обид“, „предизвикување општа опасност“ и „напад службено лице при вршење на службена должност“.

Истото лице е осомничено дека палел автомобили со таблички РКС (Република Косово) во Зубин Поток, општина со мнозинско српско население на северот на Косово.

Во раните утрински часови на 2 април, врз полицајци во Северна Митровица била фрлена експлозивна направа, се вели во соопштението на косовската полиција. Полициските службеници биле лоцирани на улицата „Иво Лола Рибар“ во близина на Центарот за регистрација на возила и технички преглед. Во полициското соопштение не се наведува колку полицајци биле нападнати и каква е нивната состојба.

Промената на уставот по таканаречениот хрватски модел за ВМРО-ДПМНЕ е сериозно применлив и прифатлив, изјави денеска Марија Митева од ВМРО-ДПМНЕ. Таа додаде дека испраќаат јавна понуда до власта при промена на Уставот на државата да се примени хрватскиот модел во целост во однос на Преамбулата.

„Еве како би изгледал македонскиот устав, односно преамбулата ако би се земала во предвид хрватската преамбула:”Република Македонија се воспоставува како национална држава на македонскиот народ и држава на припадниците на националните малцинствата: Албанци, Турци, Роми, Власи, Бошњаци и други, кои се нејзини државјани, на кои им се гарантираат исти права со тие на македонскиот народ и остварување на националните права, во согласност со демократските норми на Организацијата на Обединети Нации“, вели Митева.

Со тоа, како што додава таа, Македонија ќе го промени мултиетничкот карактер во унитарен и аналогно на тоа „Македонија ќе биде е држава на македонскиот народ и држава во која припаѓаат националните малцинствата, кои живеат тука.“

Видете и ова:

Мицкоски - нема да има уставни измени во овој парламентарен состав

За можноста уставните измени да се направат по примерот на Хрватска, вера зборуваше и лидерот на ВМРО-ДПМНЕ Христијан Мицкоски, при што рече дека е подготвен за такво нешто, како што наведе, „ако тоа е формулата за успех, уште утре да ја почнеме процедурата да биде Македонија држава на еден народ и на малцинствата во нејзе“.

„Еве ако сакаат (СДСМ и ДУИ) уште утре да ја отвориме Преамбулата на македонскиот Устав и да го направиме тоа според хрватскиот терк, но само да не се каат, па да не речат некои други етнички заедници, а не било така како што ни кажуваат. Ако сакаат според Преамбулата на хравтскиот Устав веднаш да, не знам дали ја прочитале, ја виделе или така на памет си кажуваат, но еве ние како ВМРО-ДПМНЕ одма прифаќаме. Таква уставна измена одма прифаќаме“, изјави Мицкоски.

Сепак Мицкоски исто така рече дека во овој парламентарен состав промена на Устав нема да има.

Инаку, Министерството за правда најави дека до крајот на следната недела ќе биде формирана работната група за уставните измени, која треба да го подготви текстот на уставните амандмани, вклучително и текстот на Преамбулата за внесување на Бугарите и други помали заедници во државата, неопходни за Македонија да почне со отворање на поглавјата во преговорите со Европската унија.

Пратеникот и портпарол на СДСМ Дарко Каевски денеска ги повика Мицкоски и ВМРО-ДПМНЕ да ги дадат своите предлози во работните групи.

„Со почнување на процесот за уставните измени во Собранието ќе се отвори јавна расправа, преку работни групи, каде може и Мицкоски и ВМРО-ДПМНЕ да дадат свои предлози. Овој процес мора да биде инклузивен, транспарентен за да дојдеме до најдобрите предлози и решенија за промените во Уставот, со цел да го продолжиме европскиот пат на нашата држава“, рече Кавески.

Досегашниот став на опозициската ВМРО-ДПМНЕ беше дека нема да учествува во оваа работна група, бидејќи ваквиот процес го смета за нелегитимен.

• Зошто мнозинството е против внесувањето на Бугарите во Уставот?

Иако приоритет во работата на работната група ќе биде Преамбулата, како што велат од Министерството за правда, измените на Уставот може да значат отворање на пакет други прашања. Меѓу нив промена на формулацијата „јазикот кој го зборуваат 20 проценти од граѓаните“ со „албански јазик“, што ја поддржа и претседателот на Алијанса за Албанците Арбен Таравари.

Меѓу другите измени за кои се зборуваше беа за регулирање на вакуум просторот во работата на институциите при распуштање на Собранието и измени според кои министерот за правда не треба да биде член на Судскиот совет, како што изјави на новинарски брифинг новиот министер за правда Кренар Лога. Но, сепак Лога ден потоа се предомисли и изјави дека приоритет е промена на Преамбулата.

21-годишна жена е под истрага за наводно помагање во силување на дете под 15 години. Основното јавно обвинителство Струмица соопштии дека донело наредба за истражна постапка против жената која е осомничена дека поттикнувала и помагала две деца родени во 2007 година да силуваат девојче родено 2010 година.

Инцидентот се случил за време на новогодишна прослава во домот на еден од малолетниците. Осомничата наводно ја опила жртвата, ја соблекоа и им со тоа им помогнала на двајцата малолетници да ја силуваат.

Видете и ова:

Приведени мажи за силување на девојче помало од 14 години во Струга

„Осомничената, свесна за своето дело, им помогнала на две деца родени 2007 година, со употреба на сила, да извршат силување на девојче родено ​2010 година. Осомничената најпрвин ја поттикнувала и ја довела во алкохолизирана состојба жртвата, ја соблекла во една од собите, овозможувајќи им на двајцата малолетници да го силуваат девојчето, кое за цело време давало отпор. По целиот настан, осомничената и ја облекла облеката на жртвата и почнала да ја удира со клоци и шамари во пределот на главата“, стои во соопштението од ЈО.

Надлежниот јавен обвинител до судијата на претходна постапка доставил предлог за определување мерка притвор за осомничената.

Предлогот е прифатен и судијата со решение и определил притвор во траење од 30 дена. За двете деца во судир со законот ќе биде предложена мерка согласно член 115 од Законот за правда на децата – ставање под надзор од Центарот за социјални работи, дополнуваат од обвинитлеството.

Премиерот на Северна Македонија Димитар Ковачевски денеска во Бардолино, Италија, се сретна со претседателот на Србија Александар Вучиќ и албанскиот премиер Еди Рама.

„Ги потврдивме нашите заложби за економски просперитет на државите. Со заеднички политики го развиваме регионот и овозможуваме подобар живот за сите граѓани“, наведе Ковачевски во изјава на социјалните мрежи.

Средбата се случува пред почетокот на меѓународниот саем за вино „ВинИтали“ кој деновиве се одржува во Верона.

Ковачевски, Вучич и Рама ќе присуствуваат на 55. меѓународен Саем на вино и алкохолни пијалоци „ВинИтали“ во Верона.

Тие ќе остварат трилатерална средба со фокус на иницијативата Отворен Балкан.

Видете и ова:

Ковачевски на средба со Вучиќ во Белград

Ковачевски на 31 март беше во прва официјална посета на Белград кога се сретна со српскиот претседател Александар Вучиќ.

Тие разговараа за регионалните иницијативи Отворен Балкан и Берлинскиот процес чија цел е регионален развој и побрза интеграција на единствениот европски пазар и во Европската Унија.

Во тој контекст разговарале и за политиката на проширување на Европската Унија со земјите од Западен Балкан и за динамиката на пристапните преговори на Северна Македонија и Србија.

По средбата, беше предвидено потпишување на меморандуми за соработка во рамки на иницијативата Отворен Балкан, за мерките за подобрување на движењето на лица и стоки преку заедничката државна граница, Меморандум за разбирање - проект за електронска наплата на патарина – воспоставување интероперабилен електронски систем за наплата на патарина и Меморандум за соработка во рударството и енергетиката.

Во раните утрински часови на 2 април, врз полицајци во Северна Митровица била фрлена експлозивна направа, се вели во соопштението на косовската полиција.

Полициските службеници биле лоцирани на улицата „Иво Лола Рибар“ во близина на Центарот за регистрација на возила и технички преглед.

Како што се наведува во соопштението, државниот обвинител наредил поведување истрага за овој случај како „напад врз службено лице“.

Во полициското соопштение не се наведува колку полицајци биле нападнати и каква е нивната состојба.

Видете и ова:

Курти – Договорот за нормализација мора брзо да се спроведе

Овој инцидент доаѓа по неколку пријавени случаи на палење автомобили со регистарски таблички на РКС на северот на Косово, кој е претежно населен со Срби.

Косовската полиција во саботата на 1 април вечерта соопшти дека уапсила едно лице за учество во напад на единица на косовската полиција, „учество или организирање организирана криминална група“, „обид за убиство“, „предизвикување општа опасност“ и „напад на службено лице при вршење службено дејствие“.

По ова апсење, Српска листа, најголемата партија на косовските Срби поддржана од официјален Белград, изјави дека апсењето во Северна Митровица е „продолжение на малтретирањето на српскиот народ“ и предупреди дека доколку уапсениот не биде ослободен, „ Српска реакција“ ќе биде предизвикана.

Реагираше и Канцеларијата за Косово на Владата на Србија, која го обвини косовскиот премиер Аљбин Курти дека „предизвикува хаос и создава нова криза“.

Палењето на автомобилите започна минатата година, кога почна процесот на пререгистрација на автомобилите од таблички КМ на таблички РКС. Регистерските таблички КМ се издадени од српските власти и Косово ги смета за нелегални.

Видете и ова:

Лајчак: Имавме поголеми амбиции, но договорот од Охрид е обврзувачки

Овој процес предизвика тензии на теренот. Првично, на 31 јули беа подигнати барикади, а потоа во ноември Србите ги напуштија институциите на северот на Косово поради суспензијата на директорот на полицијата за северниот регион Ненад Ѓуриќ, кој одби да ја спроведе одлуката на Владата на Косово да ги пререгистрира регистарските таблички во РКС.

Во меѓувреме, Косово и Србија, на инсистирање на меѓународната заедница, на крајот на ноември минатата година постигнаа договор за регистарски таблички, како дел од дијалогот за нормализација на односите.

Косово се согласи да го прекине процесот на пререгистрација, додека Србија се согласи да не издава нови таблички на автомобили за автомобили со градови во Косово.

Се проценува дека на северот на Косово има околу 10.000 возила со регистарски таблички КМ.

Папата Франциск денеска претседаваше со мисата на плоштадот Свети Петар, со што ги започна настаните кои водат до Велигден, само еден ден откако ја напушти болницата по нападот на бронхитис.

Приемот на 86-годишникот во болница минатата недела со тешкотии со дишењето предизвика загриженост дека тој можеби не е доволно здрав за да присуствува на серија обреди во најважната недела во христијанскиот календар.

Но, Франциск вети дека ќе биде присутен и накратко им мавташе на околу 30.000 луѓе додека се возеше со својот попамобил низ плоштадот.

Видете и ова:

Папата Франциск денеска излезе од болница

Папата вчера ја напушти болницата за да се врати во Ватикан, откако беше лекуван, мавтајќи им на добронамерниците и медиумите кои го чекаа додека заминуваше.

„Не се исплашив, сè уште сум жив“, им рече тој на новинарите во краткиот коментар пред болницата пред да замине.

Пет сириски војници се ранети во израелски воздушни напади во текот на ноќта на 1 април во провинцијата Хомс во Сирија, јавија сириските државни медиуми, пренесе агенцијата АП.

Од почетокот на оваа година, Израел нападнал цели во Сирија девет пати, според опозициската Сириска опсерваторија за човекови права со седиште во Велика Британија.

Државната новинска агенција САНА, повикувајќи се на воени извори, објави дека целните позиции се во градот Хомс и неговата околина, а сириската воздушна одбрана пресретнала и соборила некои ракети.

Опсерваторијата соопшти дека мета на нападите биле позициите на сириската војска и милицијата поврзани со Иран, вклучително и истражувачки центар.

Израел не ги коментираше последните воздушни напади.

Видете и ова:

Советот за безбедност на ОН ја осуди легализацијата на еврејските населби на окупираните територии

Областите во Сирија под контрола на Владата во Дамаск се честа мета на израелската армија, за која Израел ретко презема одговорност, наведува АП.

Меѓутоа, Израел потврди дека ги гаѓа базите на екстремистичките организации поврзани со Иран, како што е либанскиот Хезболах.

Во израелски воздушен напад во март беше оштетен аеродромот во северниот град Алепо, поради што беше затворен два дена.

Аеродромот, меѓу другото, служи за доставување хуманитарна помош по катастрофалниот земјотрес што ги погоди Сирија и Турција на 6 февруари.

Украина изрази огорченост откако Русија на 1 април го презеде своето едномесечно претседавање со Советот за безбедност.

Русија со тоа ќе има контрола на агендата на Советот за безбедност за овој месец, за прв пат од февруари 2022 година, кога ја нападна Украина.

Претседателството на Советот за безбедност на ОН ротира меѓу неговите 15 членки на месечно ниво.

Видете и ова:

Русија претседава со Советот за безбедност на ОН и покрај противењето на Украина

Русија е една од петте постојани членки на Советот за безбедност на ОН.

Руската инвазија на Украина ја прекрши Повелбата на ОН, која бара од државите да се воздржат од употреба на сила против територијалниот интегритет или политичката независност на друга држава.

Генералното собрание на ОН со големо мнозинство усвои резолуција неколку дена по почетокот на инвазијата со која се бара Русија веднаш да ја прекине војната во Украина.

Русија го блокираше донесувањето на слична резолуција во Советот за безбедност.

Украинскиот министер за надворешни работи Дмитро Кулеба го нарече преземањето на претседавањето на Русија „шлаканица за меѓународната заедница“.

Тој ги повика другите членки на Советот за безбедност на ОН да ја спречат Москва да го злоупотреби своето претседателствување.

Граѓаните на Црна Гора денеска избираат меѓу Мило Ѓукановиќ, актуелен претседател и кандидат на Демократската партија на социјалистите и Јаков Милатовиќ, кандидат на движењето Европа сега, во вториот круг од редовните претседателски избори.

Избирачките места беа отворени во 7:00 часот, а ќе бидат затворени во 20:00 часот. Право на глас имаат 542.154 избирачи. Во првиот круг гласале 341.551 гласач или 63,6 отсто од граѓаните.

Видете и ова:

Притисок врз црногорската дијаспора пред вториот круг претседателски избори

Ѓукановиќ освои 119.673 гласови или 35,37 отсто, а Милатовиќ 97.858 гласови или 28,92 отсто.

За вториот круг Ѓукановиќ беше поддржан од Социјалдемократите, Социјалдемократската партија, Бошњачката партија и дел од албанските национални партии.

А Милатовиќ, чија партија нема пратенички статус, доби поддршка од: Демократскиот фронт, Демократите, Граѓанското движење УРА и Социјалистичката народна партија.

Ова се четврти претседателски избори од обновувањето на црногорската независност во 2006 година и седми од воведувањето на повеќепартискиот систем.

Граѓаните на Бугарија денеска гласаат на петтите парламентарни избори во земјата за две години, иако анкетите сугерираат дека и ова гласање повторно нема да даде резултат што ќе го запре политичкиот ќорсокак, којшто ја зафати најсиромашната нација во ЕУ, истовремено и една од најкорумпираните во унијата.

Повеќе од 5.600 кандидати кои претставуваат 14 политички партии и 7 партиски коалиции се пријавени за изборите за 240-членото Национално собрание - еднодомниот парламент на Бугарија.

Видете и ова:

Бугарските власти се сомневаат дека Русија стои зад дојавите за бомби

За да обезбедат места во парламентот, партите мора да обезбедат најмалку 4 отсто од гласачките ливчиња.

Гласачките места беа отворени во 7:00 часот по локално време, а ќе бидат затворени во 20:00 часот. Набргу потоа се очекуваат првите излезни анкети.

Аналитичарите велат дека излезноста може да биде попречена од серијата закани за бомби оваа недела, кои принудија да се затворат стотици училишта кои треба да функционираат како избирачки места за гласањето.

Последните анкетни податоци што ги собра Политико во својата „Анкета на анкети“ покажаа дека ГЕРБ на Бојко Борисов има 26 отсто, а слична бројка имаат „Продолжуваме со промената“ на Кирил Петков и Демократска Бугарија, кои формираа коалиција пред ова гласање.

Времето денеска ќе биде променливо облачно со сончеви периоди, а попладне со повремен локален дожд и ретки грмежи. Ќе дува слаб ветер од променлив правец. Минималната температура ќе биде во интервал од 3 до 9, а максималната ќе достигне од 14 до 20 степени.

Во Скопје променливо облачно со сончеви периоди, а попладне со повремен дожд и услови за ретки грмежи. Минималната температура ќе се спушти до 7, а максималната ќе достигне до 17 степени.

Во понеделник под влијание на нов влажен и постуден бран ќе има врнежи од дожд, кои попладне на повеќе места ќе бидат пообилни, над 30 литри на метар квадратен.

На планините и на некои повисоки места врнежите ќе бидат од снег.

Потоа во следните три дена ќе преовладува студено и ветровито време со повремени локални врнежи, претежно во западните делови.

Претседателот на ДУИ, Али Ахмети денеска по средбата на Централното претседателство кој се одржа во седиштето на партијата во Мала Речица изјави дека фракции во ДУИ не се дозволени, откако членовите на „Огнената група“ претходно најавија дека ќе делуваат како фракција во партијата.

„Фракција врз основа на статутот на ДУИ и одлуките на Конгресот, не се дозволени. Да го почекаме Конгресот, на Конгресот јас повторно ќе предложам, со најдобра цел да победи мојот предлог за непризнавање на фракции во ДУИ. Секоја постапка надвор од Статутот е анархија. А анархијата е најголемиот непријател на демократијата“, вели Ахмети.

Тој додава дека начелото е малцинството да се придружи на мислењето на мнозинството и дека најдемократското начело.

„Во спротивно да направиме анархична партија и да работиме кој како сака“, вели Ахмети.

Видете и ова:

„Огнените“ од ДУИ ќе делуваат како фракција

Членовите на Демократската унија за интеграција (ДУИ) кои се дел од таканаречената „Огнена група“ денеска го напуштија денешниот состанок на Централното претседателство кој се одржа во седиштето на партијата во Мала Речица и најавија дека ќе функционираат како фракција во ДУИ.

Актуелниот организациски секретар во ДУИ Блерим Беџети по четири часа од почетокот на состанокот, изјави дека разликите се големи и од организационен аспект внатре во ДУИ, но и од аспект на дебатата за програмските определби врз основа на кои ја добиле довербата од граѓаните.

„За жал немаме можност од реална дебата и се користат двојни или тројни аршини во однос на одредени исти и слични прашања и затоа од денеска ние ќе имаме наши ставови бидејќи ќе делуваме како фракција во рамки на ДУИ“, изјави Беџети.

Членовите на „Огнената група“ смеаат дека актуелните министри во Владата од ДУИ ја узурпирале партијата со своите одлуки.

„Тоа што е надлежност на партијата преминува во надлежност на членовите Владата и тука да се разбереме не се само кадровските прашања, тоа се релевантни и значајни, зборуваме за проргамските определби на ДУИ, рече Беџети.

На новинарските прашања дали и натаму ќе бидат дел од органите на партијата, Беџети изјави дека се избрани од друг партиски орган и дека не се разрешени.

Иако во моментов фракции не се дозволени, Ахмети изјави дека не се зборувало за исклучување на членови од партијата кои се определиле да дејствуваат фракционерски.

На седницата имало извештај за работата на партиските функционери во Владата, за кој мнозиснтвото гласало позитивно, додаде Ахмети.

За поделеноста меѓу двете групи во ДУИ јавно се зборува изминативе неколку месеци. „Огнената група“ е составена од поранешни министри, сегашни пратеници и градоначалници и е предводена од Изет Меџити, Муса Џафери и Блерим Беџети. Тие сметаат дека цел владин состав потфрлил и треба да се смени со свеж кадар. Во другата група се владините функционери Артан Груби и Бујар Османи кои имаат поддршка од претседателот на партијата Али Ахмети.

Членовите на Демократската унија за интеграција (ДУИ) кои се дел од таканаречената „Огнена група“ го напуштија денешниот состанок на Централното претседателство кој се одржа во седиштето на партијата во Мала Речица и најавија дека ќе функционираат како фракција во ДУИ.

Актуелниот организациски секретар во ДУИ Блерим Беџети по четири часа од почетокот на состанокот, изјави дека разликите се големи и од организационен аспект внатре во ДУИ, но и од аспект на дебатата за програмските определби врз основа на кои ја добиле довербата од граѓаните.

„За жал немаме можност од реална дебата и се користат двојни или тројни аршини во однос на одредени исти и слични прашања и затоа од денеска ние ќе имаме наши ставови бидејќи ќе делуваме како фракција во рамки на ДУИ“, изјави Беџети.

Видете и ова:

Конфликтот во ДУИ кулминира во Чаир

Членовите на „Огнената група“ смеаат дека актуелните министри во Владата од ДУИ ја узурпирале партијата со своите одлуки.

„Тоа што е надлежност на партијата преминува во надлежност на членовите Владата и тука да се разбереме не се само кадровските прашања, тоа се релевантни и значајни, зборуваме за проргамските определби на ДУИ, рече Беџети.

На новинарските прашања дали и натаму ќе бидат дел од органите на партијата, Беџети изјави дека се избрани од друг партиски орган и дека не се разрешени.

За поделеноста меѓу двете групи во ДУИ јавно се зборува изминативе неколку месеци. „Огнената група“ е составена од поранешни министри, сегашни пратеници и градоначалници и е предводена од Изет Меџити, Муса Џафери и Блерим Беџети. Тие сметаат дека цел владин состав потфрлил и треба да се смени со свеж кадар. Во другата група се владините функционери Артан Груби и Бујар Османи кои имаат поддршка од претседателот на партијата Али Ахмети.

• Груби сменет од партиската функција, изборите во ДУИ ги доби „Огнената група“

Пред почетокот на денешниот состанок, Османи изјави дека на седницата ќе дебатираат за сите прашања кои останале неразговарани на претходната седница, кои што ќе бидат покренати од членовите на претседателството.

ДУИ како политичка партија беше основана во 2002 година, по укинувањето на таканаречената Ослободителна народна армија (ОНА) во конфликтот во Македонија во 2001 година.

Тогаш стана најголема политичка партија од албанскиот блок и трета најголема во државата, по ВМРО-ДПМНЕ и СДСМ, и повеќе од 18 години е дел од власта, а само две години беше во опозиција.

Откако претходно повеќе од осум години беше дел од владината коалиција со ВМРО-ДПМНЕ во периодот од 2008 до 2016 година, ДУИ сега е дел од владината коалиција заедно со СДСМ.

Украинската агенција за безбедност денеска известила еден од најважните православни свештеници дека е осомничен дека ја оправдувал руската агресија, во услови на голем спор за познат православен манастир.

Митрополитот Павло, игумен на манастирот Киевско-Печерска лавра што е најсветото православно светилиште во Украина, се спротивставува на наредбите од властите да го напушти комплексот. Претходно оваа недела тој го проколна украинскиот претседател Володимир Зеленски.

Соочен со сослушување пред судот во Киев, митрополитот ги отфрли тврдењата на Службата за безбедност на Украина, позната како СБУ, дека ја одобрува руската инвазија. Тој вели дека обвинувањата се политички мотивирани.

Видете и ова:

Борби беснеат на исток, Зеленски вети дека руските војници ќе бидат казнети

СБУ, која упадна во неговиот дом, побара од судот да му одреди домашен притвор додека истрагата е во тек.

Монасите во манастирот припаѓаат на Украинската православна црква, која е обвинета за врски со Русија. Спорот за имотот, познат како Пештерскиот манастир, е дел од поширок верски конфликт што се одвива заедно со војната.

Украинските власти вршат остри мерки против Украинската православна црква поради нејзините историски врски со Руската православна црква, чиј лидер, патријархот Кирил, го поддржува рускиот претседател Владимир Путин и неговата инвазија на Украина.

Украинската црква инсистира дека е лојална на Украина и од самиот почеток ја осудува руската инвазија. Црквата прогласи независност од Москва.

Но, украинските безбедносни агенции тврдат дека некои во црквата сè уште имаат блиски врски со Москва. Тие упаднаа во неколку свети места на црквата, а подоцна објавија фотографии со рубли, руски пасоши и летоци со пораки од московскиот патријарх, како доказ дека некои црковни функционери и понатаму се лојални на Русија.

Пакистанската армија денеска соопшти дека напаѓачи од Иран убиле четворица нејзини војници на граничната патрола.

„Група терористи кои оперираат од иранска страна нападнаа рутинска гранична патрола на пакистанските безбедносни сили кои оперираат долж пакистанско-иранската граница“, се вели во соопштението на армијата.

Видете и ова:

Кина е подготвена да соработува со Русија за воените прашања

Инцидентот се случил во областа Кеч во југозападната провинција Белучистан, која дели долга беззаконска граница со Авганистан и Иран.

Армијата соопшти дека пакистанските власти воспоставуваат контакт со Иран за да побараат начини за спречување на такви инциденти во иднина.

Никој засега не презеде одговорност.