Достапни линкови

Преобразба за Македонија


Андреа Угриноска Заседавач со Европскиот Комитет за Млади при Советот на Европа

Оваа криза е шансата за младите во Македонија, Европа, и целиот свет, да се вклучени значајно во редизајнирање на новиот општествен поредок пишува во младинската он лајн колумна Андреа Угриноска, заседавач со Европскиот Комитет за Млади при Советот на Европа

Секоја криза, без разлика колку опасна и голема, има позитивен потенцијал за пoдобрување на нештата од кои сме незадоволни. Секоја криза отвара теоретска можност за преиспитување на моменталниот поредок, и практична можност за креирање на промена. Подолу ќе го споделам моето мислење околу можностите и одговорноста на младите за време на и по пандемијата, и како можеме да ја искористиме моменталната ситуација со цел создавање на нов општествен поредок во кој гласот и идеите на младите ќе бидат централни.

Навидум, тешко е да се биде лидер во вакви ново настанати услови. И многумина од моменталните лидери, вклучително и оние во полето на млади, доколку би знаеле што би ги пресретнало за време на нивниот мандат, можеби не би се ни согласиле на предизвикот уште на самиот почеток. И самиот овој факт мора да не втурне кон емпатија и разбирање кон оние кои се лидери во овој период, и кон мерките кои ги имплементираат. Но, тоа не значи дека лидерите треба да водат без одговорност, емпатија и отчетност во периодов, и пандемијата не смее да биде изговор за прекршување на Човековите Права долгорочно. Ова што го живееме денес не се нови услови, ова се истите услови на кои како млади бевме и сеуште сме изложени, но значително влошени и на моменти распределени.

Оваа криза е шансата за младите во Македонија, Европа, и целиот свет, да се вклучени значајно во редизајнирање на новиот општествен поредок и да се осигураат дека младите се во центарот на истиот. Преку надзорниот комитет за млади при Советот на Европа, го започнавме процесот на креирање на нов договор, од млади - за млади. Решивме да ги искористиме ресурсите, контактите и мрежите кои ни се достапни со цел гаранција на вклученост на младите во мерките за рестартирање на економијата и социјалниот поредок по пандемијата. Заедно со националните младински совети во секоја држава, и владините претставници задолжени за млади од државата, го бараме најдобриот договор за млади низ цела Европа, во секоја држава.

Што значи тоа за Македонија и младите? Истото што важи за сите останати Европски држави - повик за акција! Младите мора да се во првите редови, барајќи го своето заслужено место на масата за носење одлуки. Овој период младите беа искористувани медиумски на различни начини - редовно обвинети за негрижа околу почитување на мерките и пасивност околу помош на заедницата во овие тешки времиња. Но, младите кои јас ги знам и со кои работам, се токму спортивното од се набројано! Младите се оние кои ќе не спасат со нивната енергија, креативност и иновативност при пост-пандемските мерки за рестартирање на економијата и социјалниот поредок.

Да беше новиот пост-пандемски поредок целосно оставен на младите, ќе имавме нов демократски свет каде што секој/а има можности да изгради живот по свој мерак, и секој/а може да биде тоа што сака. Свет базиран на слобода и солидарност, и демократија базирана на плурализам. Гледано историски, младите се оние кои секогаш ја враќаат Македонија на правиот демократски пат кога ќе скршне (Студентски Пленум, Шарена револуција). Пост-пандемискиот поредок ќе биде изговор за многу авторитарни движења и тенденции во општеството кои ќе се трудат да ги искористат моменталните цивилизациски слабости со цел создавање нова норма на затворени општества кои се лимитирачки и дискриминираат. Младите имаат одговорност поголема од било која до сега - да се активно вклучени во градење на новиот општествен поредок преку сите достапни медиуми и канали на влијание кои им се достапни. Млади - верувам во нас!

Младите во Македонија се полни со борбеност и енергија и се жедни за промена - фактот дека многу македонци и македонки се на значајни Европски позиции и имаат успешни приказни надвор од Македонија е реалност која ја потврдува мојата изјава. Младите со својата борбеност се еден од главните двигатели на Македонија кон Европа. Меѓутоа истовремено, доста млади се, за жал, разочарани од процесот домашно, и решаваат да ја бараат својата среќа и да го искористат својот талент надвор од Македонија.

Според мене, ова не се единствените модалитети на младинско учевство. Младите имаат можност, да покажат пост-пандемски, дека немора да чекаме да влеземе во Европската Унија, за да почнеме да ги живееме Европските континентални вредности и домашно, и со тоа да сме промената која сакаме да ја видиме. Младите можат да се генерациски лидери по пример, преку секојдневно живеење на Европските вредности: демократија, владеење на право, Човекови Права, плурализам, еднаквост и достоинство - и многумина од нив веќе го прават тоа, свесно или не.

Пост-пандемскиот социјален поредок ќе биде преполн гужва со активисти/ки кои легитимно ќе застапуваат за своите каузи, со цел поттикнување на промена пост-криза. Младите не смеат да си дозволат да не се во првите редови за време на овие перговори, бидејќи само тие умеат да докажат дека нов светски поредок е возможен, и водејќи по пример, ќе докажат и како. И така и само така, Македонија ќе влезе во Европската Унија како еднакво силен партнер на останатите држави членки.

Приклучете се - сега е нашето време!

XS
SM
MD
LG