Достапни линкови

Ваши коментари - „Каков народ, таков претседател“


Новиот претседател Стево Пендаровски.

Читателите на РСЕ се скептични за најавите за помирување од новиот претседател, дел од нив му честитаат, дел не го признаваат. Ги коментираат и изјавата на Шекеринска за „метлата“ и интервјуто со амбасадорот Тимоние.

„Време е да ги залечиме отворените рани од нашето скорешно минато и реално да го започнеме граѓанското помирување, зашто немаме резервна Татковина“, рече новиот претседател на РСМ, Стево Пендаровски во инаугуративниот говор во Собранието, а Славиша Ангелковски коментира со реторичко прашање: „Откако ја продадовте цела држава помирување? Е, тоа малку потешко ќе оди...“ Борис Апостолов исто така има негативен став: „Со предавници нема помирување!“

Ели Нешовска и Трајче Трајанов му ја честитаат функцијата на претседателот Пендаровски, а Јован Коцев прашува за построената претседателска гарда пред Вила Водно: „Каква армија е оваа?“ Но Калина Хајба му одговара: „Па, македонска, и лани беше истата, што сакаш да кажеш, ај, доста раздор, ми се смачивте!“ Фадил Авдули постирал: „Добредојдојдовте, наш претседателе, нека ти е вековна функцијата“, а Мими Мими мошне кратко: „Чао, Хорхе!“

По информацијата за инаугурацијата на новиот претседател, потпишан со Џорџ Ангел налутено коментирал: „Ти си албански претседател и нема никогаш да бидеш претседател на Македонците“. Игор Стојановски ја употребува познатата изрека: „Каков народ, таков претседател“.

На нашата ФБ страница има повеќе постови и коментари по изјавата на министерката за одбрана и потпретседателка на СДСМ, Радмила Шекеринска за тоа дека таканаречената „метла“ што ја најави премиерот Зоран Заев не е само прашање на персонални рокади и промени. Лута Ахмети препорачува: „Никако рокади, тие што не ги бива на едно место нема да се подобри на друго. Има и непартиски луѓе кои се многу поуспешни од таквите со книшки“. Александар Бошковски контра Шекеринска: „Ај да почнеме со тебе, што направи досега?“

Неделното интервју на РСЕ овојпат беше со францускиот амбасадор, Кристијан Тимоние, кој покрај другото зборува и за потребата од натамошни реформи, како во судството, на пример, и дека неговата земја е свесна за големите досегашни напори, но рече, „за секое дрво ќе судиме според плодовите што ќе ги даде и ние сакаме Западен Балкан да ѝ се приклучи на ЕУ...“ Владе Петровски ги коментира неговите изјави враќајќи се во не толку далечната историја дека Европа ја растурила Југославија зашто била независна и економски силна, дека направила граѓанска војна... „и вие господа од ЕУ му туривте отров во коренот на дрвото и го исушивте и сега не знам што плодови чекате од суво дрво?“ Бранислава Личеноска го исправа Владе Петровски: „Тоа го направија Милошевиќ и Туѓман“, а Јован Наумовски Кечеги му порачува на францускиот амбасадор: „Поддржете го (Западен Балкан) како што треба, партнерски. Не сеирџиски“.

  • 16x9 Image

    Горица Попова

    Родена е во Кочани, дипломирала во 1976 год. на Филозофскиот факултет во Скопје. Како новинар работи над 30 години. Почнала во Македонско радио- Радио Скопје во 1978 год. Од јуни 2009 год. е соработник на Радио Слободна Европа.

XS
SM
MD
LG