И покрај итноста на потребата за решавање на ќорсокакот со федералниот буџет Сенатот и Претставничкиот дом не направија ништо за враќање на средствата за околу 20 насто од засегнатите владини органи.
Соединетите држави од 22 декември се наоѓаат во период на делумна парализа на работата на сојузните органи.
До ова дојде по неуспешниот обид за компромис меѓу Конгресот и Белата куќа за буџетот и за финансирањето на ѕидот на границата со Мексико.
Американскиот претседател Доналд Трамп инсистира од средствата собрани од даночните обврзници да бидат издвоени 5 милијарди долари за ѕидот.
На ова се противат демократите и некои републиканци во Конгресот.
Трамп, за време на ненадејната посета на Ирак во средата, ги интензивира неговите повици во врска со ѕидот, наведувајќи дека ќе чека колку што е потребно за да се финансира неговиот предлог.
„Што и да е потребно само да имаме ѕид, да имаме сигурност“.
Но, и демократите се подготвени да чекаат по Новата година – односно до 3 јануари кога ќе ја добијат контрола врз Претставничкиот дом по успехот на средорочните избори во ноември.
Како и да е, до изнаоѓање решение сите засегнати владини работници не можат ништо да прават освен да чекаат.
Станува збор за околу 800.000 вработени во сојузните агенции, вклучувајќи го и Одделот за домашна безбедност и Министерството за правда.
Некои вработени за кои се смета дека се „важни“ остануваат на работа, но нема да бидат платени по декември се до завршувањето на делумното затворање на владата.
Најновата анкета на Ројтерс покажува дека мнозинството Американци - 47 насто, сметаат дека Трамп е одговорен за делумното затворање на владата, додека 33 насто ги обвинуваат демократите во Конгресот.
