Говорејќи пред неговите приврзаници на еден предизборен митинг во Висконсин претседателот Доналд Трамп се осврна и врз инцидентот со пакетите со експлозивни направи упатени до поранешниот претседател Барак Обама и екс државниот секретар Хилари Клинтон, како и до други членови на Демократскaта партија и до телевизијата Си-Ен-Ен.
Тој притоа изјави дека јавните личности треба да ја смират нивната реторика и ги повика медиумите да ги запрат нивните, како што рече, „бескрајни непријателства“ и „лажни напади“:
„Јазикот на морална осуда и деструктивна рутина, ова се аргументи и несогласувања кои треба да престанат. Никој не треба безгрижно да ги споредува политичките противници со историските негативци“, рече Трамп.
Американскиот потпретседател Мајк Пенс пак вети целосна истрага и откривање на оргaнизаторите.
„Овие кукавички дела се одвратни и немаат место во американското општество. Сакам да ве уверам дека ги распоредивме целосните ресурси на тајните служби и на ФБИ и тие тесно соработуваат со полициските службеници. Ќе продолжиме да ги следиме овие истраги и одговорните ќе бидат изведени пред лицето на правдата“, рече Пенс.
Претходно, поранешниот американски државен секретар Хилари Клинтон оцени дека Соединетите Држави минуваат низ „вознемирувачки период“.
„Ова е период на длабоки поделби и затоа треба да се обединиме заедно“, рече Клинтон во Мајами на еден предизборен митинг.
Инцидентот со сомнителните пакети доаѓа во пресрет на изборите за Конгресот, закажани за 6 ноември што ги зголеми политичките тензии во САД.
Телевизиската мрежа Си-Ен-Ен наведе дека на пакетот со можен експлозив било напишано името на Џон Бренан, поранешен директор на ЦИА, кој сега е коментатор за оваа телевизија.
Напнатоста порасна кога слични пакети, освен оние адресирани до Обама и Клинтон биле пронајдени и во уредите на конгресменката Деби Васерман Шулц и гувернерот на Њујорк Ендрју Куомо.
Деновиве сличен пакет му беше упатен и на милијардерот Џорџ Сорос кој всушност е главен финансиер на политичарите на Демократската партија.
Досега никој не ја презеде одговорноста, но извори блиски на ФБИ сметаат дека тоа би можело да биде координирана акција.
