Достапни линкови

Унгарскиот премиер Орбан пред трет мандат


Орбан преку мигрантите до трет премиерски мандат
please wait

No media source currently available

0:00 0:02:30 0:00

Орбан преку мигрантите до трет премиерски мандат

Унгарскиот премиер Виктор Орбан се фокусираше врз една порака до гласачите пред изборите в недела. Само трет последователен мандат за неговата партија Фидес во владата може да и ја гарантира безбедноста на земјата со оглед на опасноста од мигрантите.

Мигрантската тема е на врвот на агендата на Орбан од 2015 година, кога Унгарија неколку месеци беше влезна врата кон Европската унија за околу 400 илјади мигранти на нивниот пат кон Германија и другите западноевропски дестинации.

Антимигрантската реторика на Орбан вклучува и предупредувања до Унгарија и Европа дека ќе ги загубат христијански идентитет и култура ако муслиманските мигранти и натаму доаѓаат во голем број.

Владиниот портпарол Золтан Ковач вели:

„Па,навистина верувам дека најжешката централна тема за актуелната кампања, и домашно, а ако сакате, и на меѓународната сцена, е илегалната миграција и прашањата поврзани со миграцијата“.

Орбан, исто така, го искористи прашањето на миграцијата во кампањата да застане и против Брисел, унгарските невладини организации кои делумно се финансирани од унгарско-американскиот милијардер и филантроп Џорџ Сорос, а од неодамна, и Обединетите нации.

Орбан вели дека сите тие работат на миграцијата и глобализацијата, со цел да бидат нарушени националните вредности на Унгарија.

Според Орбан, владата има листа на 2.000 луѓе кои „се платени да работат на соборување на владата и да ја трансформираат Унгарија во земја на имигранти“.

Џерџели Караксони, кандидат за премиер на левичарската коалиција ги отфрла овие обвинувања.

„Унгарското лево крило забележува дека постои гранична ограда и дека големо мнозинство од унгарското општество не може да ги поддржи задолжителните квоти за преселување“.

Наместо тоа, Караксони и другите лидери на опозицијата се фокусираа врз сиромаштијата, корупцијата, концентрацијата на власта и други прашања.

Сепак, голем проблем е тоа што опозицијата останува длабоко разединета, иако има неколку договори меѓу опозициските партии за координирање во некои гласачки окрузи.

Балаш Боцкеи, политички аналитичар во Институтот ИДЕА, вели:

„Се додека опозицијата е во фрагментирана состојба, поделена, и гласовите се расфрлани, оваа кампања за мигрантите е доволна за да се задржи гласачката база обединета, да се задржи мобилизирана за владата“.

  • 16x9 Image

    Гоце Атанасов

    Со новинарство започна да се занимава за време на студиите по новинарство во Скопје. Работел во Млад борец, Нова Македонија, Македонската радио телевизија, А1 телевизијата и во Дојче Веле, а во Радио Слободна Европа е од започнувањето на емитувањето на македонски јазик.

XS
SM
MD
LG