Достапни линкови

Тензии меѓу Барселона и Мадрид пред референдумот


Протести во Барселона против шпанската влада
please wait

No media source currently available

0:00 0:02:32 0:00

Протести во Барселона против шпанската влада

Десетици илјади луѓе излегоа на улиците на Барселона и во другите градови на Каталонија да протестираат по акцијата на шпанската полиција во која беа упасени неколкумина претставници на каталонската влада. Притоа биле запленети 10 милиони гласачки ливчиња за најавениот референдум за независност.

Демонстрациите на кои луѓето носеа црвено жолти знамиња на Каталонија и извикуваа пароли „Окупирачки сили надвор“ и „Каде е Европа?“ завршија со акција на полицијата при што беа приведени неколку лица.

Учесниците на протестот велат дека шпанската влада не смее да го забрани референдумот. Алесандра Хуан вели:

„Не можете да ја скршите волјата на народот. Тие донесоа многу закони, но ние не реагираме на овие закони“.

Санти Баиџ, пак, додава:

„Без сомнение ова е државен удар врз демократијата и врз нашата каталонска влада, избрана демократски од сите Каталонци, без сомнение“, вели тој.

Претходно, претседателот на Каталонија Карлес Пучдемон изјави дека по најновите апсења и замрзнувања на каталонските финансии, шпанската влада вовела вонредна состојба во Каталонија.

„Владата на Каталонија е цел на координирана агресија од страна на шпанската воена полиција, која има за цел да го спречи каталонскиот народ слободно и мирно да ја применува демократијата на 1 октомври. Тоа го нарушува владеењето на правото, сите уставни гаранции и повелбата на Европската унија за основните права“, вели тој.

Шпанскиот премиер Маријано Рахој ги предупреди каталонските лидери дека можат да избегнат поголеми штети ако се откажат од најавениот референдум за независност.

„Ако ви е до спокојството на повоќето Каталонци, откажете се од ескалација на радикализмот и непослушноста. Се уште имате време да избегнете поголеми штети“, рече Рахој.

„Владата ја исполнува својата обврска и морам да кажам дека ќе продолжиме да го правиме тоа до крајот. Мислам дека постапуваме пропорционално по работите што ги видовме во последните неколку дена во Каталонија“, рече Рахој.

Доколку референдумот успее, каталонските власти ветија дека ќе прогласат независност во рок од 48 часа.

Каталонија, која има своевидна самоуправа, е дел од Шпанија уште од 15 век.

Сепак, многу Каталонци имаат горчливи сеќавања на забраната на нивниот јазик за време на диктатурата на генералот Франциско Франко 1939-75. Во регионот живеат околу 7,5 милиони луѓе.

  • 16x9 Image

    Гоце Атанасов

    Со новинарство започна да се занимава за време на студиите по новинарство во Скопје. Работел во Млад борец, Нова Македонија, Македонската радио телевизија, А1 телевизијата и во Дојче Веле, а во Радио Слободна Европа е од започнувањето на емитувањето на македонски јазик.

XS
SM
MD
LG