Достапни линкови

Народот се обедини околу спортот, но на политика не заборави


Граѓаните ја слават победата на екипата на Вардар на Лига шампиони во ракомет

Илјадници граѓани се радуваа по Вардаровата победа, но на социјалните мрежи спротот се меша со политика.

Читајќи ги коментарите и постовите на ФБ страницата на РСЕ човек може само да се чуди колку нашиот народ не се ослободил од политиката, а богами, којзнае дали некогаш и ќе се ослободи. Оние илјадници граѓани, млади и повозрасни, што се радуваа синоќа по улиците и на плоштадот во Скопје, а веројатно и во другите градови во земјава, ја немаа таа мака. Беа едно.

За разлика од оние што своето мислење го искажале на нашата Фејсбук страница. Предраг Савов, на пример, постирал: „Вардар и Македонија вечни и неуништиви, нека пукнат соросоидите и душманите“. Раде Алексов смета дека сме биле „диктаторско радио“ и дека не ни прилегало што сме правеле директен пренос од скопскиот плоштад, зашто тој знае дека ни најмалку не сме се радувале на Вардаровата победа. Со ист тон е и коментарот на Благој Ефтимов: „Постот ви е залутан, да не сакавте да прославите за двојазичноста во Македонија“.

Има и позитивни реакции, од луѓе кои не го мешаат спортот со политика. Емре Елмази вели: „Да сакаме, секогаш можеме да бидеме први во сè“, Силвана Тилева напишала: „Толку многу граѓани и граѓанки собрани заедно – прославуваат спортска победа на својата земја...Ова е убава слика! Ова е убав народ! Ова е како треба да изгледа Македонија!“, а Раде Сања се радува исто така: „Конечно за добро се собра народ!“ Седат Ферати во својот пост извикува: „Браво, на крај се слави во Македонија!“, исто како и Нермин Вели: „Да се множат успеси, дај Боже, и во другите спортови, за убаво да се сплотуваат младите“.

И пак остар премин кон политика – По информацијата дека Обвинителството бара притвор за дедото на Тамара која почина чекајќи средства за лекување во странство од министерството за здравство и тогашниот министер Тодоров, Омар Абу Албани напишал: „Обвинителството зошто не го бараше за тоа Тодоров кога остави да умре Тамара за 30 илјади евра?“ а Хусаметин Сулејман постирал: „Толку луѓе претепавте во Парламентот, ништо не се презеде...“ Коментари за и против СДСМ и ВМРО-ДПМНЕ, едни напаѓаат, други бранат, а во постот на Александра Сандрица е кажано сè: „Засрамете се што злоупотребувате смрт на едно дете за политички реваншизам!!!“

  • 16x9 Image

    Горица Попова

    Родена е во Кочани, дипломирала во 1976 год. на Филозофскиот факултет во Скопје. Како новинар работи над 30 години. Почнала во Македонско радио- Радио Скопје во 1978 год. Од јуни 2009 год. е соработник на Радио Слободна Европа.

XS
SM
MD
LG