Достапни линкови

Втор повик до институциите од децата со посебни потреби


Арт-терапија, музико-терапија, психолошки советувалишта за родителите и спортување со специјалните олимпијци, ќе бидат само дел од активностите предвидени за тридневното кампување на родителите на деца со посебни потреби.

Глувиот сака да ја победи тишината, а слепиот да ја победи темнината , да им помогнеме да се обидат да го исполна својот сон, затоа што секој човек заслужува место под сонцето, изјави денеска Суарет Алишан, кој е дел од иницијативата „5 до 12“. Тој е речиси слеп, пораснал како сирак во домот за деца без родители, затоа што неговата биолошка мајка, која имала 100 процентно оштетување на видот, не можела да се грижи за него. Вели дека со оваа борба сака на своето идно дете и на секое друго дете да им помогне да им се овозможи услови за квалитетен живот.

„Моето искуство со институциите на системот е тоа што јас сум од мало дете пораснат во институциите на системот, затоа што јас сум со попреченост и бев дете без родителска грижа. Оваа го започнуваме јас и останатите за да докажеме дека секој има право на свое место под сонцето. Знаете глувите сакаат да ја победат тишината, а слепите да ја победат темнината, дајте да им помогнеме да се обидат да го остварат тој сон“, изјави Алишан.

Граѓанската иницијатива за изедначување на правата на лицата со посебни потреби „5 до 12“ најави дека овој викенд повторно ќе кампуваат пред Собранието три дена. Шаторите ќе ги постават в сабота наутро, а ќе ги соберат в понеделник попладне. Ова е втор пат како родители ќе кампуваат пред Собранието, со цел да им покажат на политичарите и дека не отстапуваат од нивните барања.

„И повторно ќе им се обратиме на надлежните институции, да дојдат да не видат, нас и нашите деца, и заедно да разговараме за решенијата кои се однесуваат не само на нашите деца сега и овде, туку и на следните генерации“, изјави Сузана Стојановска дел од иницијативата.

Во изминатиов месец откако родителите на децата со посебни потреби помина две ноќи во шатори пред Собранието, малку од институциите се обидоа да стапат во контакт со нас, вели Александар Петровски од иницијативата.

„Со оглед на политичката ситуација во која се наоѓаме, не можеме да кажеме дека очекувавме нешто повеќе. Но сега очекуваме штом ќе се формира Владата, веднаш институциите да не побарат нас, а не ние нив, за да започнеме разговори за промени на закони и подзаконски акти“, вели Петровски.

Тој додава дека најмалку што очекува е да се изгради еден модерен центар за лица со посебни потреби каде ќе може да се овозможат нормални услови за пошироката популација на лицата со посебни потреби, каде ќе има медицински персонал, поголема градинка со специјализирани лица, дефектолози, опрема потреба за подобар раст и развој на тие деца како и физиотерапевти и негуватели.

До сега за поддршка на иницијативата се потпишаа над 30 илјади граѓани. Десетици невладини организации работат на ревидирање на барањата кои во изминативе три години постојано се доставуваа до институциите. Од иницијативата велат дека се подготвуваат законски измени и подзаконски акти за да се овозможи подобар живот на луѓето со посебни потреби.

Во сабота и во недела во паркот„Жена Борец“ ќе бидат организирани работилници со кои сакаат да покажат дека ако им се создадат услови и можности на децата со посебни потреби, тие можат и умеат многу, вели Стојановска. Од арт-терапија, преку музико-терапија до психолошки советувалишта за родителите и спортување со специјалните олимпијци, ќе бидат само дел од активностите предвидени за тридневното кампување со што паркот Жена Борец ќе се претвори во една голема работилница за децата со посебни потреби.

  • 16x9 Image

    Зорана Гаџовска Спасовска

    Новинарската кариера ја започна во А1 телевизија. Работела на теми од образование, социјални проблеми, здравство и екологија. Родена е на 30.09.1983 година во Скопје. Од јуни 2009-та година работи како постојан дописник за Радио Слободна Европа од Скопје.

XS
SM
MD
LG