По примерот на светските метрополи, веќе традиционално, највеселата ноќ беше пречекана и на плоштадот „Пела“ во Скопје, како и во другите градови во земјава. Скопјани и гостите што дојдoа да прослават во главниот град ги забавуваа македонските музички ѕвезди Дани, Маја Панчева, Ерик и Симона, Есма, Сузана Спасовска, Наум Петревски, Мустафа Имери, Даниел Кајмаковски и Куку леле, а Новата 2015 година ќе ја дочекаат со песните на Елена Ристевска. Новогодишниот концерт траеше до раните утрински часови, а точно на полноќ, небото над Скопје беше осветлено со спектакуларен огномет.
Новата година беше пречекана и во другите градови низ земјава. Во Куманово градскиот плоштад беше домаќин на организираниот дочек на Новата 2015 година, на која овојпат за песна и игра беше задолжен сараевскиот бенд „Регина”. Претежно млади кумановчани, играа и се веселеа на минус 13, наздравувајќи во чест на годината што доаѓа. Новогодишната забава за кумановчани заврши во четириесетина минути по полноќ, но во остатокот од градот, можеше да се слушне музика и џагор во чест на доаѓањето на Новата 2015 година.
Новогодишна атмосфера во Скопје
Студеното време не ја попречи новогодишната прослава ниту во Охрид. На -9 степени Целзиусови голем број граѓани и гости излегоа на плоштадот Св. Климент Охридски каде ја дочекаа новата 2015 година. Забавата започна со Петар Нечовски, по што настапи групата „ Камелеон“, а дочекот на новата година кулминираше со настапот на македонската музичка ѕвезда Владо Јаневски. Пред присутните се обрати градоначалникот на Охрид Никола Бакрачески, а влегувањето во новта година беше означено со голем огномет над Охридското Езеро.
Многу забава и прекрасни хитови кои ја раздвижија публиката, преполн плоштад и среќни лица беше синоќешната слика на Плоштадот „Магнолија“ за дочекот на Новата 2015 година, соопшти Општина Битола. Забавата достигнала кулминација со настапот на Калиопи која изјави дека овој дочек ќе го памети по прекрасната битолска публика и извонредната организација.
Но, не сите синоќа го прославија почетокот на 2015 година. Многубројна популација луѓе времето и Новата година ги бележат според свои календари кои имаат корени во нивната етничка и религиозна историја. Таков е случајот со Евреите, Кинезите, Индусите и Муслиманите, како и со повеќе други помали етнички и религиозни заедници. Така во 2014. Евреите ја слават 5776, Кинезите 4713, Индусите 2072, а Муслиманите 1437 Нова година.
