Достапни линкови

Сандерс води како ривал на Трамп


Сандерс: ова е почеток на крајот на Трамп
please wait

No media source currently available

0:00 0:02:16 0:00

Сандерс: ова е почеток на крајот на Трамп

Сенаторот Берни Сандерс тесно победи на внатрепартиските избори во Њу Хемпшир за претседателски кандидат на Демократската партија. Со тоа тој го зацврсти неговиот статус на прв човек на демократите во изборната трка во ноември против претседатлот Доналд Трамп.

Берни Сандерс, прогресивен сенатор од Вермонт, по победата не ги нападна партиските ривали кои постојано го критикуваат поради неговите екстремно леви ставови.

Според нив, тие ќе ја одведат Демократската партија до пораз на изборите на 3 ноември против републиканскиот претседател Доналд Трамп.

„И, дозволете ми да кажам вечерва, дека оваа победа тука е почеток на крајот на Доналд Трамп“.

Сандерс, изразувајќи им благодарност и почит на другите кандидати, како Пит Бутиџеџ, Ејми Клобучар, Елизабет Ворен и Џо Бајден додаде:

„Ќе се обединиме заедно, ќе се обединиме заедно за да го победиме најопасниот претседател во модерната историја на оваа земја“.

Умерениот Пит Бутиџеџ, 38-годишен поранешен градоначалник на Јужен Бенд, Индијана, го освои второто место откако го претрка Сандерс во минатонеделниот хаотичен и спорен прв натпревар во Ајова.

Сенаторката Ејми Клобучар, заврши на третото место, додека поранешниот потпретседател Џо Бајден, кој некогаш беше водечки во демократската трка, стигна до својата втора последователна слаба завршница, петото место.

Во Ајова беше на четвртото место.

Бајден, според посматрачите, сега со сигурност ќе се соочи со прашање во врска со одржливоста на неговата кампања и неговата способност да консолидира умерена поддршка против кандидатите во подем како Бутиџеџ и Клобучар.

Изборите во Њу Хемпшир се посебно значајни, особено по тесниот исход на претходните партиски избори во Ајова кои ќе бидат запамтени по бавното објавување на резултатите поради проблем со апликацијата која се користи за собирање на гласовите.

Сандерс по победата во Њу Хемпшир, иако станува збор за мала држава, би можело да има предност и во наредните партиски избори во Невада и Јужна Каролина кои се одржуваат во февруари по што на 3 март ќе се гласа во 14 други држави.

Демократите својот кандидат ќе го изберат на партиска конвенција во јули годинава.

Во Њу Хемпшир митинг имаше претседателот Доналд Трамп кој ги критикуваше кандидатите на демократите дека „не знаат што прават“.

  • 16x9 Image

    Гоце Атанасов

    Со новинарство започна да се занимава за време на студиите по новинарство во Скопје. Работел во Млад борец, Нова Македонија, Македонската радио телевизија, А1 телевизијата и во Дојче Веле, а во Радио Слободна Европа е од започнувањето на емитувањето на македонски јазик.

XS
SM
MD
LG