Достапни линкови

Русија објави тридневен прекин на огнот, Украина тврди дека борбите продолжуваат


Цивили подготвени за евакуација во Азовстал, Мариупол
Цивили подготвени за евакуација во Азовстал, Мариупол

Москва тврди дека е договорено тридневно примирје во Мариупол за да се евакуираат останатите цивили во челичарницата Азовстал. Украинската армија пак, соопшти дека уште се водат крвави борби. Од Стејт департментот изразија сомневање за прекин на огнот, бидејќи Москва досега ги прекршила таквите најави.

Русија денеска објави тридневен прекин на огнот со цел да се евакуираат цивилите кои се уште се наоѓаат во фабриката за челик Азовстал во градот Мариупол. Според украинската армија пак се уште се водат „крвави битки“ за стратегискиот пристанишен град, а цивилите се заробени внатре.

„Руските воени сили ќе отворат хуманитарен коридор од 8 до 18 часот по московско време на 5, 6 и 7 мај на локацијата на металуршката фабрика за челик Азовстал со цел да се евакуираат цивилите“, изјави денеска рускиот министер за одбрана.

Во своето денешно обраќање украинскиот претседател Володимир Зеленски изјави дека Украина ,од своја страна, е подготвена да обезбеди прекин на огнот во Мариупол.

„Ќе биде потребно време едноставно да се извлечат луѓето од тие подруми, од тие подземни засолништа. Во сегашните услови, не можеме да користиме тешка опрема за да ги расчистиме урнатините. Сето тоа треба да се направи со рака“, рече Зеленски.

Во Вашингтон пак, портпаролот на Стејт департментот Нед Прајс изрази сомневање за прекин на огнот, велејќи дека Москва постојано ги прекршила таквите најави.

Во меѓувреме, Денис Прокопенко, командант на Азовскиот полк, вети дека никогаш нема да ја предаде фабриката за челик.

„Имаше тешки борби додека руските сили упаднаа на територијата на фабриката“, објави Прокопенко на Телеграм.

Ситуацијата во фабриката е исклучително тешка и украинската војска продолжува да се бори. Дејвид Арахамиа, член на украинската делегација во сега веќе закочените мировни преговори со Русија, за РСЕ изјави дека украинските власти имаат контакт со бранителите во фабриката и покрај претходните извештаи дека контактот е изгубен. Според Украинците, руската армија продолжува со офанзивата во источна Украина, но украинските бранители ги спречуваат нивните обиди да го пробијат фронтот долж линијата помеѓи Лиман, Северодоњецк и Попасњиск.

„На борбениот фронт, пет цивили се убиени од гранатирање од руските сили во областа Луганск во Украина во изминатите 24 часа“, изјави гувернерот Серхи Гајдаи.

Во соседна Белорусија пак, вооружените сили започнаа „изненадувачки“ големи вежби за да ја тестираат нивната борбена готовност, соопшти украинското Министерство за одбрана.

Вицепремиерката на Украина Ирина Верешчук објави уште една „мала победа“, велејќи дека на 4 мај од Мариупол биле евакуирани 344 жени, деца и стари лица.

Верешчук им се заблагодари на работниците на ОН и на Меѓународниот комитет на Црвениот крст за нивната поддршка во операцијата. ОН потврдија дека повеќе од 300 цивили добивале хуманитарна помош во Запорожје.

Во меѓувреме Асошиејтед прес денеска објави дека спровела истрага која покажува дека околу 600 цивили загинале кога Русија нападнала театар во пристанишниот град Мариупол што се користел како засолниште за бомби.

Точниот број на загинати како резултат на воздушниот напад на театарот на 16 март, кој беше јасно означен надвор како место каде што се наоѓаат деца, не е познат поради силните борби кои продолжија.

Додека украинските власти соопштија дека најмалку 300 луѓе загинале во нападот, АП рече дека според нивните проценки засновани на извештаите на 23 преживеани и спасувачи, бројката е на најмалку двојно повисоко.

Русија негираше дека таргетирала цивили откако ја започна инвазијата врз Украина на 24 февруари, но сè повеќе докази кажуваат поинаква приказна. Воздушниот напад врз академскиот регионален драмски театар во Доњецк во Мариупол се издвојува како единствениот најсмртоносен напад врз цивили досега.

„Сите луѓе сè уште се под урнатините, бидејќи урнатините се уште се таму - никој не ги ископал. Ова е една голема масовна гробница “, ја цитираше АП изјавата на Оксана Сиомина, која го преживеа смртоносниот напад.

Во меѓувреме притисокот врз Русија со санкции продолжува бидејќи Европската унија (ЕУ) вчера го претстави предлогот за целосна забрана на увозот на руска нафта до крајот на годината. Претставниците на ЕУ ја имаа својата прва дискусија за предлогот вчера, но состанокот заврши без формална поддршка за планот, бидејќи некои земји изразија загриженост за предложените мерки, рече изворот, кој одби да биде именуван поради чувствителноста на прашањето.

Унгарија, Словачка, Чешка и Бугарија изразија загриженост за ембаргото за нафта, рече изворот, истакнувајќи дека сепак може да се постигне договор на новиот состанок на пратениците во четврток. Унгарија и Словачка јавно ја искажуваат својата загриженост за ембаргото за нафта, при што Словачка во средата изјави дека сака подолг период на транзиција за да се одвикне од руската нафта, од најмалку три години. За новите санкции треба одобрение од сите 27 земји на ЕУ за да стапат на сила.

Украинскиот министер за надворешни работи Дмитро Кулеба рече дека земјите од ЕУ кои го блокираат ембаргото за нафта ќе бидат „соучесници“ во злосторствата на Русија во Украина.

„Какви и да се нивните аргументи, ако се противат на ембаргото за нафта, тоа значи едно: играат на руска страна. Тие ја делат одговорноста за сè што прави Русија во Украина и точка“, рече Кулеба во видео обраќање објавено на Твитер.

Претставниците на земјите од Европската унија кои вчера не постигнаа договор за предложеното ембарго за руска нафта, се очекува денеска повторно да се обидат да се приближат до договор.

  • 16x9 Image

    Марија Тумановска

    Марија Тумановска, родена 1981 година во Струмица. За време на студентските денови, волонтира во некои од пишаните медиуми. По завршувањето на факултетот за новинарство, станува соработник во детската редакција на Македонското радио, Радио Скопје. Подоцна работи во културниот сектор на истиот медиум. Во Радио Слободна Европа е од декември 2004 година.

XS
SM
MD
LG