Сите кандидати по гласањето рекоа дека очекуваат фер избори
Претседателскиот кандидат на СДСМ и ДУИ, Стево Пендаровски, по гласањето изјави дека очекува изборите да поминат без инциденти и да добие предност за дефинитивна победа во вториот круг. Претседателската кандидатка на ВМРО-ДПМНЕ, Гордана Сиљановска - Давкова по гласањето рече дека очекува фер избори и дека очекува да влезе во вториот круг. Кандидатот на Алијансата за Албанците и Беса, Блерим Река, рече дека очекува фер избори за земјава да ги почне преговорите со ЕУ.
Затворени гласачките места, до 18:30 гласале скоро 40 отсто од запишаните избирачи
Во 19 часот затворени се избирачките места на кои граѓаните на Македонија можеа да гласаат на првиот круг од шестите претседателски избори. Претседателот на ДИК, Оливер Дерковски соопшти дека до 18:30 на гласање излегле 39,71 проценти од гласачите, од обработени над 91 отсто од гласачките места.
Мирен изборен ден - Највисока излезност во Крива Паланка, најниска во Липково
ДИК соопшти дека излезноста до 17 часот е 35,13 проценти. Највисока е излезноста во Крива Паланка, а најниска во Липково. Од скопските општини најмногу гласале во Карпош, а најмалку во Шуто Оризари и Сарај. Нема посериозни нарушувања на изборниот процес.
Приведен гласач во кумановско Тромеѓа, го сликал гласачкото ливче
Полицијата привела едно лице во гласачко место во кумановското село Тромеѓа, кое го фотографирало гласачкото ливче, информираат од Општинската изборна комисија (ОИК) Куманово.
За случајот, како што додаваат оттаму, е во тек подготовка на записник.