Украинскиот министер за земјоделство, Микола Солски, кој беше приведен поради обвинувања за корупција, беше ослободен на 26 април откако плати кауција.

По истрагата на Националната антикорупциска канцеларија (НАБУ), украинскиот Антикорупциски суд нареди Солски да биде приведен под обвинение дека незаконски се стекнал со земјиште во вредност од околу 291 милион гривни (околу 6,8 милиони евра), пишува РСЕ на англиски јазик.

Претходно денеска, судијата нареди Солски да биде задржан во притвор до 24 јуни и одреди кауција од 75 милиони гривни (1,7 милиони евра), иако обвинителот препорача многу поголема кауција од 200 милиони гривни (4,7 милиони евра).

Во соопштението за печатот издадено од Министерството за земјоделство по налогот на судијата, се наведува дека е платена кауција од 75,7 милиони гривни за ослободување на Солски, кој „продолжува да ги врши овластувањата на министерот за земјоделство на Украина“.

Видете и ова:

Унгарија најави нови рестрикции за земјоделски производи од Украина

Не е наведено кој ја платил кауцијата. Солски (44) е првиот член на владата на претседателот Володимир Зеленски кој официјално е обвинет за корупција.

Откако беше објавено дека е осомничен за корупција, Солски на 25 април ја понуди својата оставка во писмо што на Фејсбук го објави претседателот на украинскиот парламент, Руслан Стефанчук.

„Неговата понуда ќе биде разгледана на претстојната собраниска седница“, рече Стефанчук.

Солски ги негираше обвиненијата, велејќи дека случајот е поврзан со спор помеѓу 2017 и 2018 година пред тој да стане министер. Тој вети дека целосно ќе соработува со истрагата.

Националното Биро за борба против корупцијата на Украина (НАБУ) објави претходно оваа недела дека Солски бил вмешан во заговор што резултирал со негово преземање на државно земјиште во вредност од милиони евра.

Тој, наводно, се обидел да стекне повеќе земјиште во вредност од 190 милиони гривни (околу 4,5 милиони евра).

НАБУ рече дека Солски бил координатор на шемата во која биле вклучени уште три лица, вклучително и двајца вработени во државната канцеларија за катастар.

Украинското Министерство за земјоделство ги надгледуваше напорите на Киев да продолжи со извоз на жито и други производи и покрај руските обиди да ги блокира извозните рути на Црното Море.

Зеленски го отпушти министерот за одбрана Олексеј Резников минатата година по серијата корупциски скандали поврзани со неговото министерство и набавка на резерви за украинските војници кои се борат против Русија на истокот од земјата.

Руското Министерство за правда во петокот објави дека побарало од Врховниот суд да го забрани меѓународното „Антируско сепаратистичко движење“, организација која најверојатно не постои, објави рускиот сервис на Радио Слободна Европа.

Според Министерството, рускиот Врховен суд ќе го разгледа неговото барање на 7 јуни.

Министерството смета дека ова движење се обидува да го „уништи мултинационалното единство и територијалниот интегритет на Русија“ и поради тоа треба да биде забрането во Русија.

Видете и ова:

Новите предизвици за Русија и светот во петтиот мандат на Путин

Организација наречена „Антируско сепаратистичко движење“, како што е „Меѓународното социјално ЛГБТ движење“, кое руските власти претходно го прогласија за екстремно, не постои, забележува ОВД-Инфо, организација во Русија која ја следи репресијата.

Во ноември 2023 година, Врховниот суд го забрани „Меѓународното социјално ЛГБТ движење“. Таа организација всушност не постои, но судот пресуди дека ЛГБТ активистите ширум светот имаат заеднички карактеристики што може да се смета дека учествуваат во истото движење.

Руските организации за човекови права потоа побараа од Врховниот суд да го отфрли барањето за забрана, предупредувајќи дека „невозможно е да се нарече група луѓе „социјално движење само затоа што ги обединуваат некои лични карактеристики“.

Забраната беше најдрастичниот чекор во децениското задушување на правата на ЛГБТ во Русија во времето на претседателот Владимир Путин, кој ги направи „традиционалните семејни вредности“ камен-темелник на неговото владеење.

Минатата година, Генералното обвинителство означи како непожелни организации две движења регистрирани во странство - „Лигата на слободни нации„ и „Форумот на слободни народи на пост-Русија“, кои се залагаат за самоопределување на етничките републики во рамките на Руската Федерација.

Европската Унија (ЕУ) донесе одлука за одвои дополнителни 68 милиони евра помош за Палестинците со цел справување со тешката хуманитарна криза во Газа и со постојаниот пораст на потребите на цивилите на теренот, соопшти Европската Комисија.

Според еврокомесарот за управување со кризи Јанез Ленарчич, во Газа се случува на вистинска хуманитарна катастрофа која претставува екстремна опасност што може да ги доведе Палестинците во критична состојба.

„Драматичниот биланс на жртви и повредени меѓу цивилите, од кои повеќето се жени и деца, уништувањето на виталните инфраструктури и претстојниот глад во Газа мора да бидат аларм за будење за целата меѓународна заедница“, истакна Ленарчич.

Видете и ова:

УНИЦЕФ: Газа е најопасното место на светот за децата

Според него, цивилите не треба да бидат тие што ја плаќаат цената на конфликтите.

„Палестинците не можат повеќе да чекаат да пристигне значајна помош, Израел мора да стори повеќе за да се избегне понатамошна човечка катастрофа. Почитувањето на меѓународното право е најважно“, заклучи еврокомесарот Ленарчич.

Видете и ова:

ЕУ и САД воведоа санкции поради насилство врз Палестинците на Западниот Брег

Оваа дополнителна хуманитарна помош ќе се дистрибуира преку партнерски организации на ЕУ кои веќе им помагаат на Палестинците во Газа и во целиот регион. Помошта првенствено е наменета за задоволување на потребите за храна и вода, здравствена заштита, санитарии и објекти за сместување.

Со овие 68 милиони евра вкупната хуманитарна помош што ЕУ ја обезбеди за Палестинците во Газа и во целиот регион во 2024 година достигна 193 милиони евра.

Претседателката на српскиот парламент, Ана Брнабиќ, за недела, 2 јуни, распиша локални избори во 66 единици на локалната самоуправа во Србија.

Во своето обраќање во српскиот парламент, Брнабиќ рече дека распишувањето на локалните избори за 2 јуни, кога ќе се одржат и изборите во Белград, е резултат на „успешниот дијалог“ и усвојувањето со двотретинско мнозинство во парламентот на измените и дополнувањата на законот за локални избори.

„Среќна сум што испративме порака од парламентот до сите наши граѓани дека како нивни избрани претставници сме способни да постигнеме договор и покрај сите наши разлики. Ваквиот договор е победа на сите одговорни луѓе“, рече претседателката на српскиот парламент.

Видете и ова:

Коалицијата „Србија против насилството“ оди на избори под слоганот „Ја избирам борбата“

Веднаш потоа, претседателот на привремената управа на Белград, Александар Шапиќ, за недела, 2 јуни, распиша избори во 17 белградски општини.

Шапиќ рече дека од денеска почнуваат роковите за спроведување на изборните дејствија.

„Им посакувам среќа на сите учесници на изборите и на граѓаните кои покрај претставниците во собранијата на градските општини избираат и свои претставници за Собранието на град Белград“, рече Шапиќ.

На нешто повеќе од еден месец до изборите, опозицијата е поделена дали да учествува на нив или да ги бојкотира.

Како што е најавено, на изборите ќе учествуваат Зелениот левичарски фронт, Народното движење на Србија, Еколошкото востание, Демократската партија, Движењето на слободни граѓани и Новиот лик на Србија, додека Партијата за слобода и правда, Србија центар и од коалицијата НАДА најавија дека нема да учествуваат бидејќи сметаат дека нема време за подобрување на изборните услови до 2 јуни.

Покрај гореспоменатите партии кои исто така учествуваа на декемвриските избори, за власт во Белград одлучи да се кандидира и Движењето „Крени-промени“, а кандидат за градоначалник ќе биде неговиот програмски директор Саво Манојловиќ.

По изборите на 17 декември, опозицијата ја обвини владата за кражба, а владејачката Српска напредна партија (СНС) и државниот врв ги отфрлија ваквите тврдења.

И меѓународните и домашните набљудувачи констатираа нерегуларности на изборите.

Меѓународната набљудувачка мисија на Канцеларијата на ОБСЕ за демократски институции и човекови права (ОДИХР) издаде 25 препораки до властите за подобрување на изборните услови.

Воениот суд во Сибир осуди двајца тинејџери на затворски казни за графити против руската инвазија на Украина во 2022 година.

Деветнаесетгодишниот Александар Снежков е осуден на шест, а 16-годишната Љубов Лизунова на три и пол години затвор за кривично дело поттикнување терористички и екстремистички активности.

Претходно обвинителот побара седум години за Снежков и пет за Лизунова, јавува Радио Слободна Европа на англиски јазик.

Третообвинет во случајот беше Владислав Вишневски, а судот го осуди на една и пол година принудна работа.

Видете и ова:

Феминистички групи во Русија под притисок на власта за „традиционалните вредности“

Тинејџерите беа приведени на крајот на октомври 2022 година во сибирскиот град Чита, откако на една од гаражите го напишаа графитот „Смрт за режимот“.

Најпрвин биле следени, но во јануари 2023 година се дознало дека Александар бил уапсен и ставен во истражен затвор во Омск, додека Лизунова била префрлена во домашен притвор.

На почетокот на април 2024 година, судот ја испрати и во истражен притвор.

Тие беа обвинети за кривично дело вандализам, но судот ја одби таа тужба поради застареност.

Снежков претходно за РСЕ изјави дека тој и Лизунова со своите графити сакале да го изразат своето противење на „репресијата и војната во Украина“.

„Живееме во време на репресија, уништување на сопствениот народ во војна и во мир. Многумина го почувствуваа растот на цените поради уништувањето на економијата, секој месец дознавам за апсења. Ситуацијата само ќе се влоши“, изјави тогаш Александар.

Поранешниот американски претседател и републикански претседателски кандидат Доналд Трамп изјави дека е подготвен да го обнови конзервативниот сојуз со унгарскиот премиер Виктор Орбан.

Во видео-порака, Трамп изјави дека со нетрпение очекува тесна соработка со Орбан кога, како што изјави, повторно ќе положи заклетва како 47-ми претседател на САД, пренесуваат американските медиуми.

Трамп, во пораката, го нарече Орбан голем човек и истакна дека додека бил претседател на САД, работел со него на подобрување на вредностите и интересите на САД и Унгарија.

Видете и ова:

Орбан: Планот на Трамп за крај на војната во Украина е да го прекине финансирањето

Пораката на Трамп беше емитувана на собир во БУдимпешта на Конзервативно-политичката акциска конференција (CPAC) што е најистакната конзервативна организација во САД.

Тоа беше трет собир на CPAC во Унгарија.

Орбан беше еден од најблиските сојузници на Трамп во Европа за време на неговото претседателствување, а двајцата се сретнаа на Флорида минатиот месец.

По нивниот состанок, Орбан ја истакна својата јасна поддршка за Трамп и додаде дека само враќањето на Трамп во Белата куќа може да донесе мир во Украина.

На состанокот на највисоките дипломати на САД и Кина, денеска (26 април) во Пекинг, кинескиот министер за надворешни работи Ванг Ји го предупреди својот американски колега Eнтони Блинкен, да не преминува преку кинеските црвени линии.

Ванг го отвори состанокот со прашање кое повеќе звучеше како предупредување, а тоа е дали Кина и Соединетите Држави (САД) треба да се држат до вистинската насока да се движат напред со стабилност или да се вратат на надолната патека.

„Кинеско-американските односи почнуваат да се стабилизираат, но тие се уште се тестираат од „негативни фактори. Двете земји би можеле да соработуваат или не, па дури и „да влезат во конфликт“, рече Ванг.

Тој нагласи дека за Кина црвените линии се суверенитетот, безбедноста и развојот и ги предупреди САД да не ги надминуваат, пренесува Би-би-си.

Видете и ова:

Преку војните во Газа и Украина, Кина се обидува да го води глобалниот југ

Блинкен, кој е во втора посета на Кина за помалку од една година, беше повнимателен во неговите забелешки на Ванг пред новинарите.

„Пекинг и Вашингтон имаат заедничка одговорност да ги придвижат односите напред преку „активна дипломатија“, рече тој.

И покрај тоа, тој рече дека ќе биде јасен и директен за разликите меѓу нивните земји за да се избегнат погрешни пресметки во нивните односи.

Некои од овие разлики беа истакнати претходно оваа недела, откако Вашингтон го одобри својот најнов пакет помош што вклучуваше воена помош за Тајван. Ова предизвика остри критики од Пекинг, кој го нарече „сериозно кршење на принципот една Кина“.

Видете и ова:

Кина го осуди одобрувањето на американскиот пакет воена помош за Тајван

Кина тврди дека самоуправниот Тајван е отцепена провинција која на крајот ќе дојде под контрола на Пекинг, но островот се смета себеси за одделен.

Посетата на Блинкен, исто така, доаѓа неколку дена откако САД го усвоија законот што ќе го принуди Тик-Ток во кинеска сопственост да продава или да биде забранет во Америка.

Зад сцената, Американците го предупредуваа Пекинг да престане да извезува делови во Русија за кои вели дека и помагаат на Москва во нејзината војна во Украина.

Посетата, колку и да е студена, сепак, е дел од значителното зголемување на дијалогот и дипломатијата меѓу овие ривалски сили, како обид да се изедначат односите по периодот на огромна тензија минатата година.

Зголемувањето на цената на полисите за задолжително автомобилско осигурување е неоправдан чекор на осигурителните компании, смета Агенцијата за супервизија на осигурување, по добиените известувања од осигурителните компании дека ќе ја зголемат цената на полисите за осигурување. Новите цени се повисоки за 15 отсто и се однесуваат за автомобили со моќност над 44 киловати (КВ) и за товарните возила. Премијата за осигурување за возилата со моќност до 44 киловати останува иста.

„По извршените пресметки утврдено е дека зголемувањето на цената, со дадените образложенија, не е оправдано“, се наведува во соопштението од АСО.

Поради тоа, како што се нагласува во соопштението, Агенцијата за супервизија на осигурување доставила предлог до Министерството за финансии, во рамки на неговите законски надлежности, да иницира изготвување и донесување нова тарифа на премии за задолжително осигурување од автомобилска одговорност. И со тоа да го ограничи износот на режискиот додаток што ќе овозможи намалување на цената на полисите за задолжително осигурување од автомобилска одговорност.

Осигурителните компании ја добиле информацијата за покачување на цените во понеделникот. Тие биле известени од Националното Биро за осигурување.

Осигурителните компании го правдаат поскапувањето со растот на цените на автоделовите.

Кинеската компанија ByteDance, која е сопственик на Тик-Ток рече дека не планира да ја продава популарната апликација, откако Сенатот на Соединетите Држави усвои нацрт-закон со кој се бара Тик-Ток да се продава или да се забрани во Америка.

„ByteDance не планира да го продаде Тик-Ток, објави компанијата на својата официјална сметка на Toutiao, социјалната мрежа што исто така ја поседува.

Претходно оваа недела, Тик-Ток рече дека ќе поднесе жалба на „неуставниот“ закон на суд.

Најавата на ByteDance доаѓа како одговор на медиумските извештаи дека размислува за можна продажба на оваа апликација во САД.

„Извештаите во странските медиуми за продажба на Тик-Ток од ByteDance се невистинити“, соопшти компанијата.

Видете и ова:

Американскиот Сенат усвои нацрт-закон со кој може да се забрани Тик-Ток

Американскиот претседател Џо Бајден во средата потпиша закон со кој ќе се забрани Тик-Ток во Соединетите Држави, доколку неговиот сопственик ByteDance не го продаде во рок од една година.

Политичките претставници од двете страни во САД, како и правни и разузнавачки службеници - изразија загриженост дека кинеските власти би можеле да го принудат ByteDance да предаде податоци за повеќе од 170 милиони Американци кои користат Тик-Ток.

Нивната загриженост произлегува од серија кинески закони за национална безбедност - кои ги обврзуваат организациите да и помогнат на земјата да собира податоци.

Тик-Ток ги отфрли тврдењата дека може да се користи како алатка на кинеската влада.

Компанијата соопшти дека никогаш не споделила податоци за американските корисници со кинеските власти и дека нема да го стори тоа дури и да биде побарано.

Денеска во Индија почна втората фаза од гласањето на најголемите избори во светот, додека актуелниот премиер Нарендра Моди и неговите ривали се фокусираат на горливите прашања како што се верската дискриминација, позитивната дискриминација на обесправените групи и даноците.

Речиси една милијарда луѓе имаат право да гласаат на парламентарните избори во седум фази кои почнаа на 19 април, а ќе завршат на 1 јуни, а гласовите ќе се пребројат на 4 јуни.

Видете и ова:

Во Индија почнаа парламентарните избори кои ќе траат до 1 јуни

Моди бара трет последователен мандат врз основа на неговите економски резултати, мерките за социјална заштита, националната гордост, хинду национализмот и личната популарност. Анкетите покажуваат дека тој лесно ќе освои големо мнозинство.

Опозицијата направи сојуз од дваесетина партии и ветува поголема позитивна дискриминација, повеќе социјални бенефиции и крај на автократското владеење за кое го обвинуваат актуелниот премиер Моди.

Денеска се гласа за 88 од вкупно 543 места во Долниот дом на парламентот, а право на глас имаат 160 милиони луѓе. Се протега преку 13 држави и федерални територии во најнаселената земја во светот.