На официјалниот Инстаграм профил „Иднината на Србија“, претседателот на Република Србија, Александар Вучиќ, објави дека имал важен и значаен разговор со државниот секретар на Соединетите Американски Држави (САД) Марк Рубио.
Како што е наведено во соопштението, разговорот бил фокусиран на зајакнување на политичкиот дијалог меѓу Србија и САД, подобрување на економската соработка и заедничките безбедносни предизвици.
„Посебен акцент беше ставен на прашања од областа на економијата и трговијата, вклучувајќи го решавањето на американските царини, како и можностите за нови инвестиции, соработка во енергетиката и развој на нови технологии. Беа разгледани и перспективите што ги нуди механизмот за стратешки дијалог меѓу двете земји“, пишува во објавата на Инстаграм.
Видете и ова: Сенките на 90-тите, Вучиќ и повлекувањето на ЗападотВучиќ истакна дека Србија е посветена на зачувување на мирот и стабилноста како предуслов за понатамошен напредок и подобар живот за граѓаните. Тој им се заблагодари на САД за нивната улога во заштитата на безбедноста на српскиот народ во Косово, како и за нивниот придонес во дијалогот меѓу Белград и Приштина.
Тој, исто така, ја истакна важноста на американската поддршка на европскиот пат на Србија, наведувајќи дека полноправното членство во Европската Унија е една од стратешките цели на земјата.
„Отворен и искрен дијалог, заснован на меѓусебна доверба и почитување, е најдобриот начин за зајакнување на партнерството меѓу Србија и САД“, рече Вучиќ, додавајќи дека верува оти односите меѓу двете земји ќе добијат дополнителен импулс во иднина, во нивна заемна корист и во интерес на мирот, стабилноста и просперитетот.