Европската комесарка за проширување Марта Кос го посети Цетиње на 17-ти јануари за да им оддаде почит на жртвите од масовното убиство во кое загинаа 13 лица, меѓу кои и две деца.
Кос, придружуван од градоначалникот на Цетиње, Никола Ѓурашковиќ и амбасадорот на Европската унија (ЕУ) во Црна Гора, Јохан Сатлер, запалија свеќи пред споменикот на Ловќенска вила.
Изразувајќи сочувство до семејствата на жртвите, таа рече дека ЕУ ќе продолжи да стои покрај граѓаните на Цетиње.
„Не сте сами. Овој момент на тага нека биде потсетник на моќта на заедништвото – во вашата заедница, Црна Гора и поширокото европско семејство. Заедно ќе ги надминеме сите предизвици и ќе обезбедиме посветла иднина за Цетиње.
Поради масакрот во Цетиње, неколку илјади граѓани прексиноќа протестираа во Подгорица барајќи оставки од вицепремиерот задолжен за безбедност Алекса Бечиќ и министерот за внатрешни работи Данило Шарановиќ.
Насобраните рекоа дека масакрот е последица на урнат систем и неодговорни постапки на власта и дека државата не направила ништо за да ги заштити граѓаните.
Вашиот пребарувач не подржува HTML5
Илјадници Црногорци бараат оставки од министри поради масакрот во Цетиње
Комесарката укажа на исклучителната важност на Цетиње како симбол на европското културно наследство.
Таа особено ја истакна поддршката на градот за украинскиот народ од почетокот на руската агресија во февруари 2022 година.
„Вашите неодамнешни маршеви за поддршка на Украина длабоко не допреа, демонстрирајќи ја непоколебливата посветеност на Цетиње на европските вредности. Овој град е олицетворение на издржливоста, културното богатство и солидарноста - вредности кои се во срцето на ЕУ“, рече Кос.
Цетиње е единствениот град во светот каде што секојдневно се одржуваа прошетки за поддршка на Украина првите сто дена по почетокот на руската агресија, а потоа секој 24-ти во месецот.
Граѓаните на Цетиње на 19 ноември 2024 година со протестен марш на илјадатиот ден од руската агресија врз таа земја ја покажаа својата поддршка на украинскиот народ.