Иранскиот претседател потпиша Пакт за „стратешко партнерство“ во Москва

Иранскиот претседател Масуд Пезешкијан во петокот пристигна во официјална посета на Русија и се очекува да разговара со рускиот претседател Владимир Путин.

Авионот на иранскиот лидер слета на московскиот аеродром Внуково околу 10 часот по локално време, јави ТАСС.

„Пезешкијан треба да разговара со рускиот претседател Владимир Путин, по што претседателите ќе потпишат договор за сеопфатно стратешко партнерство меѓу Москва и Техеран“, се вели во соопштението на агенцијата.

Двајцата лидери, како што претходно објави Кремљ, ќе разговараат и за опциите за понатамошно проширување на врските меѓу Москва и Техеран, вклучувајќи трговија и инвестиции, транспорт и логистика и хуманитарна сфера.

Пезешкијан на аеродромот го пречека руска делегација предводена од министерот за енергетика Сергеј Цивилев. Тој беше придружуван од заменик-министерот за надворешни работи на Руската Федерација Андреј Руденко и раководителот на Одделот за државен протокол во Министерството за надворешни работи Игор Богдашев.

Видете и ова: Путин и Пезешкијан неделава ќе потпишат договор за стратешко партнерство

Иранскиот претседател двапати се сретна со Путин - во октомври минатата година, прво на маргините на меѓународниот форум во Ашгабат, Туркменистан, а подоцна и на самитот на БРИКС во Казан.

Во август, Пезешкијан му вети на секретарот на рускиот совет за безбедност Сергеј Шојгу дека ќе му се одмазди на Израел за убиството на лидерот на Политбирото на Хамас, Исмаил Ханије.
Русија ги зајакнува врските со Иран и други земји непријателски настроени кон САД, како што е Северна Кореја, од почетокот на војната во Украина.

Рускиот министер за надворешни работи Сергеј Лавров во октомври изјави дека Москва и Техеран имаат намера да потпишат пакт за стратешко партнерство што ќе вклучи поблиска соработка во областа на одбраната.

Соединетите Држави во септември го обвинија Техеран дека и доставува балистички ракети на Русија за употреба против Украина и воведоа санкции за бродови и компании за кои рекоа дека се вклучени во снабдувањето со иранско оружје. Техеран негира дека и ги дал ракетите на Москва.