Министерката за надворешни работи на Словенија, Тања Фајон, на 2 септември го отвори годинашниот Бледски стратешки форум, посочувајќи дека одговорот на голем број кризи и конфликти во светот мора да биде политиката и дипломатијата.
„Овогодинешното име на форумот „Светот на паралелните реалности“ се чини дека е соодветно бидејќи ја отсликува состојбата на светот денес, укажува на голем број неправди и нееднаквости, покажува неискреност и двојни стандарди во одлучувањето. ги покажува и последиците од неисполнетите ветувања“, рече Фајон.
Таа додаде дека бројот на оружје и конфликти во светот само се зголемува, дека бројот на војни е превисок и дека во моментов 92 земји, или речиси половина од вкупниот број во светот, се во конфликт надвор од нивните граници.
„Политиката и дипломатијата мора да ги надминат сите посебни интереси кои водат до ваков развој на состојбите во светот“, рече министерот на земјата-домаќин на Форумот, на кој ќе присуствуваат претставници од бројни земји, дипломати, професори, истражувачи и претставници на компаниите и невладиниот сектор.
Во контекст на растечката криза на Блискиот исток, Фајон повика на признавање на Палестина како суверена држава и поддршка за решение со две држави. Таа, исто така, ја повика Русија да престане со својата агресија врз Украина и додаде дека поддршката на Европската унија за Киев останува решителна.
Видете и ова:
Москва го обвини Киев за масовен напад со дронови врз РусијаМеѓу учесниците на дводневниот состанок во Блед ќе бидат и претседателката на Европската комисија, Урсула фон дер Лајен и највисоките функционери на земјите од Западен Балкан.
Покрај Фајон, форумот ќе го отвори и претседателот на Словенија, домаќинката Наташа Пирц Мусар, а потоа на форумот ќе се обратат и генералниот секретар на ОН Антонио Гутереш (преку видео порака) и Фон дер Лајен.
Србија ќе ја претставува премиерот Милош Вучевиќ, кој ќе учествува на Лидерскиот панел со премиерите на Словенија, Хрватска и Албанија, Роберт Голоб, Андреј Пленковиќ и Еди Рама.
Црна Гора на Форумот ќе ја претставува вицепремиерот за надворешни и европски прашања Филип Ивановиќ, а Босна и Херцеговина, Северна Македонија и Косово од шефовите на дипломатиите Елмедин Конаковиќ, Тимчо Муцунски и Доника Гервала-Шварц.
Наградата за извонреден партнер на Бледскиот стратешки форум за 2024 година премиерот Голоб ќе и ја додели на Јулија Навални, вдовицата на рускиот опозициски лидер Алексеј Навални, претседател на Советодавниот одбор на Фондацијата за борба против корупцијата.
Меѓу учесниците на Форумот ќе бидат специјалниот претставник на ЕУ за Западен Балкан Мирослав Лајчак, високиот претставник за Босна и Херцеговина, Кристијан Шмит, амбасадорот на САД во Белград Кристофер Хил, министерката за европска интеграција на Србија Тања Мишчевиќ, шефовите на дипломатијата на Хрватска и Унгарија, Гордан Грлиќ Радман и Петер Сијарто и познатиот шахист Гари Каспаров, ко-основач на Форумот Слободна Русија.
Годишната конференција на Бледскиот стратешки форум, која традиционално се одржува во Блед кон крајот на август или почетокот на септември, собира учесници од различни области за да разменат мислења и да дојдат до идеи за надминување на сегашните и идните предизвици.