Повторените израелски наредби за евакуација во Појасот Газа раселија 90 отсто од 2,1 милион жители на палестинската територија од почетокот на војната меѓу Израел и Хамас, изјави највисокиот хуманитарен претставник на Обединетите Нации (ОН) за Газа, Муханад Хади.
Организацијата Хамас, од САД и ЕУ е прогласена за терористичка организација.
Хади прецизираше дека само во август имало 12 вакви наредби и дека наредбите за евакуација ги загрозуваат цивилите наместо да ги штитат, пренесе агенцијата Асошиејтед Прес (АП).
„Тие ги принудуваат семејствата повторно да бегаат, често под оган и со малку работи што можат да ги понесат со себе, во области кои се се помали, пренаселени и небезбедни“, додаде хуманитарниот претставник на ОН.
Лишени се од медицинска нега, засолниште, бунари и хуманитарни материјали, „тие бегаат од едно уништено место до друго и не им се гледа крајот“, вели Хади.
Тој подвлече дека меѓународното хуманитарно право бара цивилите да бидат заштитени и дека е неопходно да се ослободат израелските заложници, да се олесни хуманитарниот пристап и да се постигне договор за прекин на огнот.
Видете и ова: Американската амбасадорка во ОН: На повидок е договор за прекин на огнот во ГазаКонфликтот во Појасот Газа започна откако во октомври 2023 година, вооружените екстремисти на Хамас, убиле околу 1.200 Израелци и киднапирале околу 250 заложници, според израелските податоци.
Потоа, израелската армија започна со напади во Газа, при што беше уништен добар дел од станбената и друга инфраструктура на енклавата.
Според палестинската здравствена управа, која е под контрола на Хамас, досега се убиени најмалку 40.000 луѓе.
Меѓународните хуманитарни организации предупредуваат дека низ Газа се шират болести и глад, а 2,3 милиони луѓе се протерани од своите домови.