Новинарот на белорускиот сервис на Радио Слободна Европа (РСЕ) - Радио Свабода, Андреј Кузниечик, на 21 август го одбележа својот 1000 ден затвор, јави белорускиот сервис на РСЕ.
Кузниечик, РСЕ и организациите за човекови права сметаат дека обвинувањата против него се политички мотивирани.
Кузниечик, татко на две деца, беше уапсен на 25 ноември 2021 година и првично беше осуден на 10 дена затвор под обвинение за непристојно однесување. Тој ги негираше обвинувањата.
По отслужувањето на затворската казна, Кузниечик беше задржан во притвор, а потоа белоруските власти го обвинија за создавање екстремистичка група, што официјалните лица со месеци го чуваа во тајност од роднините и колегите на Кузниечик.
На 8 јуни 2022 година, регионалниот суд во Махиљево на истокот на земјата го прогласи Кузниечик за виновен и го осуди на шест години затвор. Судењето траеше само еден ден.
Групите за човекови права во Белорусија го сметаат Кузниечик за политички затвореник.
Видете и ова: Новинарката на РСЕ, Алсу Курмашева, која е во руски затвор, номинирана за награда на УНЕСКОКузниечик, кој се изјасни за невин по обвиненијата против него, заедно со околу 150 белоруски политички затвореници, вклучително и уште еден новинар на РСЕ, Ихар Лосик и поранешниот претседателски кандидат Виктор Бабарика, ја отслужуваат казната во истата поправна колонија бр. 1 во градот Наваполак северно од Белорусија.
Таа колонија е позната како една од најстрогите во Белорусија. Се наоѓа на територијата на која беа сместени голем број привремени работнички бараки за тогаш изградената рафинерија за нафта во 1958 година.
Подоцна, локацијата била претворена во поправна колонија број 10, каде што казната ја отслужувале претежно членови и водачи на организирани криминални групи.
Белоруските власти почнаа да испраќаат политички затвореници во поправната колонија во 2010 година. Седум години подоцна, казнено-поправниот дом го смени името во Поправна колонија бр.1.
Откако спорните претседателски избори во август 2020 година предизвикаа масовни протести поради победата на авторитарниот лидер Александар Лукашенко, десетици илјади Белоруси беа уапсени поради изразување несогласување против актуелниот режим. Повеќето опозициски политичари, кои ги сметаат изборите во 2020 година за наместени и нелегитимни, оттогаш беа принудени да ја напуштат Белорусија од безбедносни причини.
Многу западни влади одбија да ги признаат изборните резултати и не го сметаат Лукашенко за легитимен лидер на земјата. Како одговор на ситуацијата во земјата, неколку земји, вклучувајќи ги Соединетите Американски Држави (САД) и Европската унија (ЕУ), воведоа санкции кон Белорусија