Претставниците на занаетчиската комора ќе се сретнат со претставници на надлежните министерства и ќе ги изложат предлозите занаетчиите од услужните дејности да можат да работат и во недела, соопштија денеска надлежните ЗКРСМ. Занаетчиите уште при носење на овој закон реагираа дека не е во интерес ниту на малите, микропретпријатија, ниту пак на државата која на овој начин, според нив ја поттикнува сивата економија.
„Ние не бараме да не го почитуваме законот, туку напротив ќе ги плаќаме нашите вработени, но бараме да ни дозволат да работиме. Ќе го земам пример Куманово како погранично место. Во неделите, особено сега во летниот период имаме свадби, прослави, родендени, крштевки. Огромен број сограѓани одат во соседните држави на фризер, козметичар, таму ги оставаат парите. Не работат ниту цвеќарите, не може ниту за смртни случаи да се купи цвеќе. Губитници сме сите и државата и ние како занаетчии“, изјави претседателот на ЗКРСМ, Агрон Фазлији.
Видете и ова: Трендафилов: Несериозни се барањата за повторно отворање на законот за недела неработен денОд комората не се задоволни ниту од субвенциите кои ги нуди Министерството за економија и велат дека паушално оданочените занаетчии не можат да аплицираат за таа мерка, бидејќи се ограничени од процедурите.
„Ние бараме соодветни субвенции кои ќе го поттикнат развојот на занаетчиството како гранка во државата, да можат да вработат луѓе, да ја поттикнат локалната економија“, изјави Фазлији.
Комората ги повика институциите да ги земат предвид специфичните потреби на занаетчиите и да предложат алтернативни решенија кои ќе ги заштитат нивните интереси и ќе овозможат континуитет на нивната работа. Оттаму велат дека е потребно е да се ревидира и олесни регулативата, со цел да им се дозволи на овие занаетчии да работат и во недела, за да можат да го задржат нивниот приход и да ги задоволат потребите на клиентите.