Регионалниот суд во Свердловск во рускиот град Екатеринбург соопшти дека го пoместил продолжувањето на судењето на новинарот на Волстрит Џурнал, Еван Гершкович, кој повеќе од една година е во руски притвор под обвинение за шпионажа. И Гершкович и владата на Соединетите Држави ги отфрлија обвинувањата како политички мотивирани.
Според судот, датумот за следно судење е поместен од 13 август на 18 јули на барање на одбраната на Гершкович. Од судењето, кое започна на 26 јуни и се одржува зад затворени врати, не беа обелоденети аргументите на тимот на одбраната.
Гершкович беше уапсен во Екатеринбург на 29 март 2023 година, за време на службено патување. Тој е обвинет за обид да добие воени тајни и да и ги пренесе на ЦИА.
Амбасадата на САД во Москва во соопштение по воведното сослушување на судењето на 26 јуни информираше дека руските власти не доставиле докази за да ги поткрепат обвиненијата и повикаа на итно ослободување на Гершкович. Исто така, побара Москва да престане да ги користи американските државјани како потпора за политички цели.
Видете и ова: Кои се Американците уапсени во Русија?Гершкович, син на имигранти од поранешниот Советски Сојуз, роден во Америка, е првиот американски новинар уапсен под обвинение за шпионирање во Русија по Студената војна.
Нему му се заканува затворска казна до 20 години доколку биде прогласен за виновен, исход кој е повеќе од сигурен.
Волстрит Џурнал и американската влада категорично ги отфрлија обвиненијата, велејќи дека Гершкович (32) само ја вршел својата работа како акредитиран новинар кога бил уапсен.
Гершкович е задржан во злогласниот московски затвор Лефортово од неговото апсење, а сите негови апели за ослободување се одбиени.
Гершкович и уште еден американски државјанин, Пол Вилан, кој отслужува 16-годишна затворска казна поради обвинение за шпионажа, владата на САД ги означи за „погрешно притворени“.
Таквата ознака осигурува дека случајот е доделен на Канцеларијата на специјалниот пратеник за заложнички работи во американскиот Стејт департмент, со што ќе се подигне политичкиот профил на нивната ситуација и ќе и се дозволи на американската администрација да одвои повеќе ресурси за обезбедување на ослободувањето на затворениците.
Видете и ова: Mедиумски организации од САД го повикуваат Бајден да ја прогласи Курмашева за „неправедно притворена“Гершкович е еден од двајцата американски репортери кои во моментов се задржани од руските власти. Другата е Алсу Курмашева, новинарка на РСЕ, која има двојно американско-руско државјанство.
Курмашева (47) беше уапсена во Казан во октомври и беше обвинета дека не се регистрирала како „странски агент“ според казнениот руски закон што ги таргетира новинарите, активистите на граѓанското општество и други. Таа, исто така, е обвинета за ширење невистини за руската војска и се соочува со 10 години затвор, доколку биде осудена.
РСЕ и американската влада велат дека обвиненијата се одмазда за нејзината работа како новинарка на радиодифузерот во Прага.