Граѓаните на Северна Македонија, Србија и Албанија од 5 март можат да ја користат мерката слободен пристап до пазарот на трудот во рамки на Отворен Балкан.
Мерката, како што соопшти прес-службата на владата на Северна Македонија, произлегува од меѓународните договори потпишани меѓу трите државни членки на иницијативата Отворен Балкан и тоа Договорот за услови за слободен пристап до пазарот на трудот во Западен Балкан, како и Договорот за интерконекција на шеми за електронска идентификација на граѓаните од Западен Балкан.
„Мерката има цел да придонесе кон отстранување на бариерите кои ја попречуваат трговијата и слободното движење на луѓето и да овозможи користење електронски услуги во рамките на самата иницијатива“, се наведува во соопштението.
Видете и ова: Отворен Балкан може да остане без угостители, земјоделци и градежнициЗаинтересираните граѓани за слободен пристап до пазарите на труд на Северна Македонија, Албанија и Србија најпрво треба да извадат идентификациски број на Отворен Балкан на порталот за е-услуги во својата држава, со што потоа аплицираат за одобрение за слободен пристап до пазарот на трудот во останатите две држави. Постапката се одвива целосно електронски и трае до 30 дена.
Откако заинтересираните граѓани ќе поднесат барање за издавање идентификациски број за Отворен Балкан кое веднаш се генерира, следен чекор е со тој број да аплицираат за сертификат за слободен пристап до пазарот на труд во Србија или во Албанија.
Oдговорни институции за спроведување на мерката во Северна Македонија се Министерството за информатичко општество и администрација преку порталот uslugi.gov.mk во делот на издавање идентификациски број за Отворен Балкан, Министерството за внатрешни работи во делот на издавање матичен број за странци и центрите на Агенцијата за вработување во делот за издавање сертификат за слободен пристап до пазарот на труд, со кој се овозможува вработување во Северна Македонија.
Оваа мерка, како што се посочува во соопштението, придонесува кон напредок и економски просперитет, имајќи ја предвид важноста на полето на движење на работниците. Мерката во целост е усогласена и го почитува спроведувањето на правото на ЕУ во областа на слободно движење на работниците и подготвување за поблиска интеграција на единствениот пазар на ЕУ.
„Ова значи дека со овие новости и олеснувања, граѓаните добиваат многу побрз и многу полесен пристап до можностите за работа во трите држави. Од моментот на обезбедување пристап на пазарот на труд, во сите следни фази кои подразбираат преговори за работа, вработување и пензиско-здравствено осигурување, правата и обврските на граѓаните и компаниите остануваат неизменети, односно исти како и до сега, во согласност со националните законодавства“, се наведува во соопштението.
Со стартот на реализација на овие договори, на лицата ќе им се овозможува непречен престој од две години во кои имаат право да најдат работа.