На 1 февруари, американскиот претседател Џо Бајден издаде извршна наредба насочена кон израелските доселеници на Западниот Брег кои ги напаѓаат Палестинците на окупираната територија, воведувајќи финансиски санкции и првичната рунда на визни забрани против четири лица.
Тие доселеници биле вклучени во акти на насилство, како и во закани и обиди за уништување или запленување на палестински имот, според наредбата. Казните имаат за цел да ги блокираат четворицата да го користат американскиот финансиски систем и да им забранат на американските граѓани да се занимаваат со нив. Американските власти рекоа дека размислуваат дали да ги казнат другите вклучени во нападите што се интензивираа за време на израелската војна со милитантната група Хамас, која е прогласена за терористичка организација од САД и ЕУ.
Видете и ова: Не стивнуваат борбите помеѓу израелската армија и ХамасПалестинските власти соопштија дека некои Палестинци се убиени, а групите за човекови права велат дека доселениците запалиле автомобили и нападнале неколку мали бедуински заедници, принудувајќи ги да се евакуираат.
„Овие акции ги поткопуваат надворешнополитичките цели на Соединетите држави, вклучително и одржливоста на решението за две држави и обезбедувањето дека Израелците и Палестинците можат да постигнат еднакви мерки на безбедност, просперитет и слобода“, вели Бајден во наредбата.
„Тие, исто така, ја поткопуваат безбедноста на Израел и имаат потенцијал да доведат до поширока регионална дестабилизација на Блискиот Исток, загрозувајќи го персоналот и интересите на Соединетите држави“, се вели во извештајот.
Бајден се соочува со зголемени критики во врска со поддршката на неговата администрација за Израел додека се зголемуваат жртвите во конфликтот, кој започна кога милитантната група Хамас го нападна Израел на 7 октомври.
Неговата наредба за санкции е редок потег против најблискиот сојузник на Америка на Блискиот Исток, за кој Бајден вели дека има право да се брани. Но, демократскиот претседател изврши притисок врз владата на израелскиот премиер Бенјамин Нетанјаху да покаже поголема воздржаност во нејзините воени операции насочени кон искоренување на Хамас.
Бајден се изјасни против одмаздничките напади на израелските доселеници и вети дека одговорните за насилството ќе одговараат. На крајот на октомври, тој рече дека насилството на „екстремистичките доселеници“ претставува „долевање бензин“ на пожарите што веќе горат на Блискиот Исток.
„Тоа мора да престане. Тие треба да одговараат. Мора да престане сега“, рече Бајден.
Видете и ова: Бајден е под сè поголем притисок да го нападне ИранИзраелските одбранбени сили ги засилија нападите низ Западниот Брег од почетокот на војната. Милитантите на Хамас се присутни на Западниот Брег, но главно делуваат во подземјето поради упориштето на Израел на таа територија. Палестинците ја обвинија израелската војска дека не успеала да ги спречи нападите на доселениците или, понекогаш, дури и ги заштитува тие доселеници.
Советникот за национална безбедност на Белата куќа, Џејк Саливан, на 31-ви јануари во Белата куќа се состана со Рон Дермер, израелскиот министер за стратешки прашања. Американски официјални лица изјавија дека израелската влада била однапред известена за санкциите.
Наредбата ќе му даде на Министерството за финансии овластување да воведе финансиски санкции за доселениците вклучени во насилство, но не е наменета за американските граѓани.
Значителен број доселеници на Западниот Брег имаат американско државјанство, а американскиот закон забранува трансакции со санкционирани лица.
Американските законодавци се фокусираа на улогата на Американците или двојните граѓани во насилството и заплашувањето на доселениците. Во писмо минатиот месец, сенаторот Бен Кардин, претседател на Комитетот за надворешни односи на Сенатот, побара од Белата куќа да преземе мерки против сите американски граѓани кои се вклучени во нападите врз Палестинците. Тој рече дека тоа може да вклучи кривични пријави и финансиски санкции
„Мора да има силна порака против екстремните активности преземени од некои доселеници на Западниот Брег, кои ги загрозуваат животите на Палестинците, како и мирот во регионот“, им рече Кардин на новинарите на 1 февруари.
Наредбата на Бајден прв ја објави Политико.
Официјални лица рекоа дека нема планови за казнување на крајнодесничарските израелски министри кои го бранеа насилството на израелските доселеници и повикаа на проширување на насилството.
Видете и ова: Маскирани израелски војници убиле тројца Палестинци во болница на Западниот БрегНовата извршна наредба доаѓа кога Бајден требаше да го посети Мичиген на 1 февруари за да добие поддршка од членовите на синдикатот во клучната претседателска држава.
Демократскиот претседател се соочи со остри критики од арапските и муслиманските лидери поради неговото справување со војната со Хамас, а сенката од конфликтот ги загрижи некои демократи дека може да има големо влијание врз исходот од ноемвриските избори.
Тимот на кампањата на претседателот веќе виде алармантни знаци на растечки јаз со арапско-американската заедница во Мичиген.
Минатата недела, менаџерот на кампањата на претседателот, Џули Чавез Родригез, отпатува во предградието на Детроит и откри дека многу лидери на заедницата не се подготвени да се сретнат со неа. Некои фрустрирани од политиката на Бајден за Израел работат на обесхрабрување на гласачите да го поддржат претседателот на општите избори.
Стејт департментот објави во декември дека ќе воведе забрана за патување на екстремистичките еврејски доселеници кои се вмешани во неодамнешните серија напади врз Палестинците на окупираниот Западен Брег.
Одделот не објави поединечни визни забрани. Сепак, официјалните лица тогаш рекоа дека забраните ќе опфатат „десетици“ доселеници и нивните семејства, а ќе следуваат уште ако насилството продолжи.