Собранието на Северна Македонија денеска ќе одржи седница со единствена точка на дневниот ред - избор на техничка влада, која се формира на сто дена пред парламентарните избори закажани на 8 мај.
Собранието ја избира техничката влада со мнозинство гласови од вкупниот број пратеници. Гласањето треба да заврши до полноќ.
Видете и ова: Закажана седницата за избор на техничка влада, Џафери ги достави програмата и предлозите за министриМандатарот Талат Џафери вчера ја достави програмата и Предлог-составот на новата влада.
Во програмата пишува дека приоритет на оваа влада ќе бидат успешно организирање на слободни, фер и демократски избори, продолжување на сите процеси кои произлегуваат од започнатите пристапни преговори со ЕУ и забрзаната европска интеграција, раст и развој на економијата, пораст на животниот стандард, намалување на инфлацијата, владеење на правото, борба против криминалот и корупцијата, продолжување на реформските процеси на сите државни нивоа....
Според Изборниот законик и Законот за Влада, во преодните или технички влади има министри од владејачкото мнозинство и најголемата опозициска партија. Техничката влада функционира се до избор на нова влада.
Во Предлог - составот на преодната влада што Џафери го достави до Собранието предлага прв заменик премиер на владата и вицепремиер за европски прашања да биде Бојан Маричиќ, додека Артан Груби - министер за политички систем и односи меѓу заедниците.
Панче Тошковски на предлог на ВМРО-ДПМНЕ е предложен за министер за внатрешни работи, како и Ѓоко Велковски за предлог за министер за труд и социјална политика.
СДСМ го предложи Митко Бојмацалиев е кандидат за дополнителен заменик министер за внатрешни работи, а досегашната министерка Јованка Тренчевска ќе биде дополнителна заменилка министерка во труд и социјална политика.
ВМРО-ДПМНЕ за дополнителен заменик– министер за финансии ја предложи Елена Петрова, за информатичко општество и администрација Стефан Андоновски, а за земјоделство, шумарство и водостопанство Цветан Трипуновски.
Преодната влада ќе функционира до изборот на новата влада.
Ова е трета преодна или техничка влада по 2016 година. Премиер на техничката влада во 2016 година беше Емил Димитриев, додека во 2020 година беше Оливер Спасовски.
На 8 мај покрај на парламентарни, ќе се гласа и во втор круг претседателски избори. Првиот круг претседателски избори ќе се одржи на 24 април.