Пратеничката група на Европскиот сојуз за промени, од денеска ќе ја бојкотира работата на Собранието, се додека на дневен ред на Парламентот не дојде поставувањето на нивниот член за кандидат во Државната изборна комисија (ДИК), Абдуш Демири.
Пратеничката Сафије Садики Шаини, на прес-конференција на оваа пратеничка група пред Собранието, кажа дека ова е само првиот чекор, и оти очекува „македонската опозиција да остане лојална на изјавата дека ќе ја напуштат ДИК доколку албанската опозиција не постави свој член во ДИК“.
„Трпението ни е при крај. Апелиравме до претседателот на Собранието, Талат Џафери, да не го узурпира правото на опозицијата да биде застапена во ДИК, но и покрај нашите напори да го почитуваме Изборниот законик, ДУИ по секоја цена измислува пречки како да создаде предуслови за манипулација на изборниот процес, со цел да се ублажи поразот што ќе и се случи на 8-ми Мај. А пак, алатката со која ја извршува оваа задача е токму Џафери“, рече Садики Шаини.
Видете и ова: Партиски тактизирања за ДИК може да фрлат дамка врз изборитеСпоред неа, техничката влада ќе биде бескорисна ако ДИК остане некомплетна или соодносот на нејзините членови остане 5:2 во корист на власта, додавајќи дека, ако и по блокадата на Собранието не биде исполнето нивното право за член во ДИК, ќе ги заостреле опозициските мерки.
„Дали ќе ги блокираме избирачките места во Чаир и Тетово или ќе има некоја порадикална мерка, тоа ќе го разгледаме како коалиција, но додека ова мнозинство се однесува арогантно кон едно законско право, додека институциите на правдата оглувуваат, ние веќе не чувствуваме обврска кон никого“, рече таа.
Со партиски игри и калкулации за избор на член на Државната изборна комисија (ДИК), Собранието ја заврши 2023 година. На околу четири месеци пред избори, пратениците треба да изберат кој ќе го пополни испразнетото место, што во февруари го испразни Кренар Лога, кој стана министер за правда, кога неговата партија Алијанса за Албанците реши да влезе во владејачката коалиција.
Изборите ќе се распишаат крајот на февруари 2024 година, а еден месец претходно ќе се формира техничка влада на чело со Талат Џафери од ДУИ. Претседателското столче во Собранието, пак, ќе го заземе Јован Митрески од СДСМ.