Меркел: Евреите мора да се чувствуваат безбедно во Германија

Поранешната германска канцеларка Ангела Меркел повика на решителна акција против антисемитизмот во Германија.

„Демократското мнозинство во нашата земја мора да остане будно“, предупреди таа во изјава што ја дистрибуираше нејзината канцеларија на 8 ноември по повод 85-годишнината од Кристалната нoќ, бруталниот погром во 1938 година, извршен од нацистите.

„Борбата против сите форми на непријателство кон Евреите - од десно, од лево, како и со оние мотивирани од исламот - е наша државна и граѓанска должност. Евреите мора да се чувствуваат безбедно во Германија“, рече Меркел.

Поранешната канцеларка објасни дека 85 години подоцна сликата во Германија е проблематична.

„Животот повторно цвета во Германија, а во исто време доживуваме загрижувачки антисемитизам кој ги загрозува животите на Евреите во нашата земја и други места во светот за кои се сметаше дека се безбедни“, рече Меркел.

Видете и ова:

Таа ги опиша случаите на антисемитски изјави на протестите во Германија, по нападот врз Израел од страна на палестинската милитантна група Хамас, како особено одбивни и повика на казнување на злосторствата од омраза.

Таа ги предупреди оние кои би можеле да ја користат „легитимната желба за палестинска држава“ и легитимната критика на политиките во Германија или Израел како „покритие за оживување на нивната омраза кон државата Израел и Евреите“.

„Таквите дејствија претставуваат злоупотреба на основните права на слобода на мислење и слобода на собирање. Ова мора да се казни и да се стави крај со сите средства на располагање на нашата уставна држава“, рече Меркел.