Украина соопшти дека нејзините сили предизвикале „значителна“ штета на руската ракетна корвета на Крим пред два дена, велејќи дека бродот „Асколд“ можеби нема да може да се поправи, објави украинскиот сервис на Радио Слободна Европа.
„Потврдено е. Рускиот ракетен носач „Асколд“, најновиот брод од класата Каракурт со стелт технологија“, објави украинската војска.
Во соопштението се наведува дека ракетната корвета е оштетена во напад на поморската и пристанишната инфраструктура на бродоградилиштето на заливот на окупираниот Крим.
Украинскиот претседател Володимир Зеленски изјави дека војската го погодила бродот Асколд во бродоградилиштето Керч на Крим, кој беше незаконски анектиран од Русија во 2014 година.
„Им благодарам на сите што обезбедија успешно уништување на рускиот брод во бродоградилиштето Керч“, рече Зеленски во видео-обраќањето ноќе.
Видете и ова: Најмалку 14 повредени во најновите руски напади во УкраинаДва дена претходно руската војска соопшти дека украинскиот ракетен напад врз бродоградилиште на Крим оштетил руски брод.
Руското Министерство за одбрана соопшти дека 15 крстосувачки проектили биле истрелани врз бродоградилиште во источен Крим, додавајќи дека 13 биле соборени, без да прецизира дали е направена некаква штета.
Украинската војска на 4 ноември исто така објави дека извршила „успешен напад“ на бродоградилиштето. Таа додаде дека во бродоградилиштето се наоѓа еден од „најмодерните“ руски бродови, но тогаш не наведе детали.
Претходно во понеделникот Украина прогласи тревога за голем воздушен напад, наредувајќи им на граѓаните да се евакуираат поради индициите за можен нов бран руски напади.
Попладневното предупредување дојде откако Русија претходно во понеделникот ја погоди Одеса, главното украинско пристаниште на Црното Море, со проектили и беспилотни летала, при што беа повредени најмалку осум лица и предизвикана голема штета на познатиот музеј на уметност и станбените згради во историскиот центар на градот, додека остатоците од беспилотни летала предизвикаа пожар на магацини со жито.