Гувернерката на Мејн: Најмалку 18 лица се убиени во пукањето во Луистон

Најмалку 18 лица се убиени во пукањето во Мејн, изјави во четвртокот, 26 октомври, гувернерката на оваа американска сојузна држава Џенет Милс.

Милс на прес-конференцијата рече дека осомничен за пукањето, во кое биле ранети и 13 лица, е Роберт Кард.

Стотици полицајци трагаат по Кард откако тој отвори оган во средата навечер во куглана и ресторан во градот Луистон.

Милс рече дека се смета оти Кард е вооружен и опасен.

Видете и ова: Пукање во американскиот град Луистон, има жртви

На жителите во Луистон претходно им беше кажано да се засолнат, да ги заклучат вратите и да останат таму до понатамошно известување. Овие препораки беа проширени и за околните градови Лисабон и Обурн, како и Боудоин кој е роден град на осомничениот.

„Ве замолуваме да останете во вашите домови бидејќи повеќе од 100 истражители, локални и федерални, работат на лоцирање на Роберт Кард, кој е личност од интерес за пукањето во Луистон“, напиша полицијата на мрежата Х (поранешен Твитер).

Во соопштението од Министерството за државна безбедност претходно наведоа дека во потрагата се вклучени федерални агенции, како и локални и државни.

Главниот медицински центар во Мејн објави дека реагира на „масовната несреќа, масовното пукање“ и оти се координира со останатите болници во тој регион за да ги згрижи ранетите.