Украинската војска соопшти дека нејзината контраофанзива на југот и на истокот на земјата продолжува, додека руското Министерство за одбрана објави дека соборил беспилотно летало кон Москва.
Тешките борби продолжуваат во југоисточниот регион Запорожје, соопшти украинската војска на 31 август, додавајќи дека руските сили претрпеле значителни загуби во близина на Бахмут, во источниот регион Доњецк.
Во меѓувреме, руското Министерство за одбрана соопшти дека нивните сили за воздушна одбрана во областа Воскресенски го собориле, како што го нарече, украинскиот дрон на пат кон Москва на 31 август.
Градоначалникот на Москва Сергеј Собјанин, повикувајќи се на прелиминарни информации, на Телеграм напиша дека нема жртви или материјална штета. Не е јасно дали дронот е лансиран во Украина или од руска територија.
Аеродромите Внуково и Домодедово во руската престолнина продолжија со работа утрото на 31 август, откако накратко беа затворени како безбедносна мерка.
Видете и ова: Шест украински војници загинале во пад на хеликоптер на истокот на земјатаПоследниве денови имаше повеќекратни прекини на полетувањата и слетувањата на московските аеродроми поради ризиците од беспилотни летала.
Во украинскиот регион Доњецк на 30 август, екипата на украинскиот сервис на РСЕ избегна повреда откако нивното возило беше под ракетен оган.
Инцидентот во кој беше екипата од двајца новинари и еден возач се случил додека тие известуваа во близина на линијата на фронтот на тековната контраофанзива на украинската војска против окупаторските руски сили.
Инцидентот се случи откако шестмина украински војници беа пријавени загинати во пад на два хеликоптери во регионот Доњецк на 29 август, поради извештаите дека Киев ги засилил нападите и во Русија и на југот на Украина.
Во несреќата наводно учествувале два хеликоптери Ми-8 во близина на градот Краматорск.
Некои медиуми објавија дека инцидентот се случил во близина на Бахмут, украинскиот град заземен од руските сили и местото каде што продолжуваат тешките борби.