НАТО најави промена во воените планови за одбрана од Русија

Руските вооружени сили имаат модрици, но во никој случај не се поразени во војната во Украина. Ова го изјави денеска претседателот на Воениот комитет на НАТО, Роб Бауер. Тој најави најголема промена од Студената војна во воените планови на Алијансата, во случај Москва да се осмели да го прошири конфликтот.

Според него „никогаш не треба да се потценуваат Русите и нивната способност да се закрепнат“.

Бауер истакна дека новото планирање на НАТО се заснова на силата на руската војска пред рускиот претседател Владимир Путин да започне војна против Украина во февруари минатата година. Според него војната ја исцрпила руската пешадија, но не и нејзината морнарица или воздухопловство.

„Она што генерално го гледаме е дека Русите се претпазливи во однос на НАТО. Тие не се за барање конфликт со НАТО. Мислам дека тоа е знак дека тие се многу, многу зафатени. Во копнениот домен, не мислам имаат многу сили на располагање, ако ги има, што му прават на некој друг“, рече Бауер.

Видете и ова: Литванија повикува дополнителни сили на НАТО на границата

Сепак, тој изрази уверување дека Русите ќе закрепнат и додаде дека НАТО „ќе продолжи да ги гледа како сериозна закана“.

Се очекува лидерите на земјите-членки на НАТО да ја поддржат голема ревизија на системот за планирање на Алијансата на Самитот во Вилнус, што ќе се одржи на 11-12 јули.

НАТО како организација не испорачува оружје и муниција на Украина. Алијансата се обидува да избегне да биде вовлечена во поширока војна со нуклеарно вооружената Русија, а во исто време значително да ја зајакне безбедноста на своите членки кои се во близина на Русија, Украина и Белорусија.

Видете и ова: Германија ќе распореди 4000 војници во Литванија за да го зајакне крилото на НАТО

Околу 40.000 војници се во подготвеност од Естонија на север до Романија на Црното Море. На тоа подрачје секојдневно полетуваат околу 100 авиони на Алијансата, а во Балтичкото и Средоземното Море оперираат вкупно 27 воени бродови.

Целта на новите планови на НАТО е да има до 300.000 војници подготвени да се дислоцираат во источното крило на Алијансата во рок од 30 дена. Плановите ја делат територијата на НАТО на три зони, крајниот север и Атлантикот, зона северно од Алпите и третата во јужна Европа.