Специјалниот пратеник на Соединетите Американски Држави за Западен Балкан, Габриел Ескобар, оцени дека договорот за нормализација на односите меѓу Белград и Приштина е „огромно достигнување“ и дека претставува „историски чекор напред“ во развојот на односите меѓу Србија и Косово.
Во интервју за црногорската новинска агенција Мина, Ескобар изјави дека „не гледа причина“ зошто договорот за преостанатите прашања не може да биде склучен до крајот на летото, пренесува Бета.
Во Србија, како што наведе, има одредени елементи кои мора да се исполнат во однос на признавањето на регистарските таблички на автомобилите, личните карти и некои други работи.
„И од Косово се очекува да формира Заедница на општини со српско мнозинство. Жал ми е, тоа не е очекување. Тоа е обврска“, рече Ескобар.
Тој рече дека САД сакаат овие процеси да се одвиваат што е можно побрзо.
„Не гледам причина зошто не може да се заврши до крајот на летото“, рече Ескобар.
Тој потсети дека договорот меѓу двете страни е правно обврзувачки, и дека сега прашање е како целосно да се спроведе.
Ескобар изјави дека е оптимист оти целта ќе биде постигната. Тој верува дека претседателот на Србија, Александар Вучиќ, и премиерот на Косово, Албин Курти, „можат да покажат политичката храброст неопходна за преземање правилни чекори“.
Косово и Србија на 27 февруари во Брисел постигнаа Договор за нормализирање на односите, додека на 18 март во Охрид постигнаа договор за Анексот за негова имплементација.
Во интервјуто, Ескобар предупреди и дека постои „опасност од руско мешање“ на парламентарните избори во Црна Гора, закажани за 11 јуни.
Тој рече дека „таа опасност отсекогаш постоела дури и на изборите во САД“.
„Бидете уверени дека ќе се обидат да ги искористат сите разлики и сите воспоставени методи - ботови и дезинформации во обид да ја оттргнат Црна Гора од нејзиниот европски пат. Затоа се грижам за изборите не само во Црна Гора, туку и во регионот“, изјави Ескобар.
Според него, граѓаните на Црна Гора на претходните избори го избрале единствениот вистински пат пред Црна Гора – евроатлантските интеграции.
Ескобар на 20 мај присуствуваше на инаугурацијата на црногорскиот претседател Јаков Милатовиќ.