Се интензивираа воздушните напади врз цели во суданскиот главен град Картум, јавува германската новинска агенција ДПА. До ова дојде откако обидот да се воспостави 24-часовен прекин на огнот не успеа. Денеска е петти ден од почетокот на борбите меѓу ривалските војски.
До сега имаше три неуспешни обиди за прекин на огнот меѓу армискиот началник и де факто водач Абдел Фатах ал-Бурхан и неговиот заменик Мохамед Хамдан Дагло, шеф на паравоените Сили за брза поддршка (РСФ).
Видете и ова: Завојуваните генерали прогласија 24-часовен прекин на огнот во Судан
Двајца најмоќни генерали и нивните трупи се борат за превласт во политички нестабилната земја во североисточна Африка.
Тие двајца владеат со земјата со околу 46 милиони луѓе, богата со злато и нафта, од воениот удар во 2021 година.
Светската здравстена организација соопшти дека во насилствата што од саботата избувнаа во Судан веќе се загинати 270 лица, а 2.600 се повредени. Меѓународната федерација на Црвениот крст и Црвената полумесечина соопшти дека е скоро невозможно да се пружи хуманитарна помош во главниот град и оти здравствениот систем во земјата е во опасност од колапс. Продолжувањето на конфронтацијата може да го втурне Судан во поширок конфликт, додека земјата се бори со економски колапс и племенско насилство.