Железничката пруга Битола-Меџитлија е завршена и има употребна дозвола, а работни групи на техничко ниво од Северна Македонија и Грција треба да ги договорат деталите за нејзино целосно ставање во функција, изјави денеска министерот за транспорт и врски Благој Бочварски.
Тој посочи дека делницата поврзува две држави, поради што мора да има согласност и интерес од грчка страна за таа да профункционира.
„Нашите работни групи се подготвени на техничко ниво за да разговараат за почнување, односно ставање во функција на железничката линија. Ние сме целосно подготвени и очекувам интерес да покаже и Република Грција“, изјави Бочварски, на новинарско прашање при посетата на Битола.
На 1 февруари годинава стартуваше железничкиот превоз на патници од Битола до селата Кравари и Жабени каде што во моментов завршува превозот со железница, иако самата железничка линија е трасирана за возовите да патуваат до Лерин или Солун.
Обновата на пругата од Битола за Грција заврши пред четири години, но се случи пандемијата и нејзиното пуштање се оддолжи. Ако се постигне договор, ова ќе значи враќање на возот за Лерин по пауза од скоро 4 децении.