Едногласно со 89 гласа „за“, пратениците денеска го изгласаа Законот за задолжување на државната енергетска компанија ЕСМ кај Кредитната банка за обнова – КфВ, за заемот од 25 милиони евра.
Рокот на отплата на заемот е 15 години, со вклучен грејс период од пет години. Каматната стапка ќе се утврдува одделно за секоја транша од заемот при нејзино повлекување, а заемот ќе се отплаќа во полугодишни рати кои пристигнуваат за плаќање на 30 јуни и 30 декември.
Инаку, преку Програмата за обновлива енергија ЕСМ - Компонента I, ќе се спроведува ревитализација на хидроелектраните Вруток, Врбен, Равен, Тиквеш, Шпилје, Глобочица, Козјак и Св.Петка.
За ова вкупно се потребни 36,2 милиони евра, а покрај заемот од 25 милиони евра, обезбедени се и 11,2 милиони евра инвестициски грант од Инвестицискиот фонд за Западен Балкан - ВБИФ.
Со ревитализацијата се очекува да се добие зголемување на инсталираната моќност од минимум 13,5 мегавати и зголемено производство на електрична енергија од околу 47,5 гигават часови годишно, намалени трошоци за одржување, зголемена доверливост и стабилност на системот за снабдување со електрична енергија.
Претходните две фази за ревитализација на хидроелектраните исто така се финансирани со заеми, од Светска банка и од КфВ.