Продолжуваат руските неселективни напади по воени и цивилни цели во источна и јужна Украина, соопштија на 20 февруари украинските власти, и покрај тоа што украинскиот претседател Володимир Зеленски рече дека руските загуби во клучните области до регионот Донецк биле „исклучително значајни“.
Русија изврши 10 ракетни напади и 25 воздушни напади во источниот регион Луганск и Доњецк, како и во јужниот регион Запорожје, соопшти Генералштабот на украинската војска во својот дневен извештај, додавајќи дека 62 напади од повеќе ракетни фрлачи биле регистрирани и долж линијата на фронтот.
„Непријателот продолжува да ги фокусира своите главни напори на изведување офанзивни дејства во насоките Купјанск, Лиман, Бахмут, Авдијивка и Шахтјор“, се вели во соопштението.
Генералштабот соопшти дека во гранатирањето биле убиени и ранети цивили, но не се наведуваат детали. Од Генералштабот предупредија дека останува висока заканата од руски напади ширум Украина.
Видете и ова: ЕУ ќе и помогне на Украина со нова процедура за набавка на муниција
Зеленски на 19 февруари рече дека неговите сили и нанеле „извонредно значајни“ загуби на руската војска во борбите во Доњецк околу Бахмут и Вухледар.
„Ситуацијата е многу тешка“, рече Зеленски во видео обраќање на 19 февруари.
Руската инвазија на Украина започна пред речиси една година, на 24 февруари 2022.