Експлозии биле забележани денеска во близина на рускиот воен аеродром Белбек на окупираниот украински полуостров Крим, додека Москва ги обнови своите воздушни напади врз украинската цивилна инфраструктура. Шефот на пристанишниот град Севастопол, инсталиран во Русија, Михаил Развозаев, на Телеграм наведе дека два дрона биле соборени од руските сили. РСЕ не може да го потврди тој извештај. Во Белбек е стациониран 38-от борбен полк на руските воздухопловни сили. Тој беше цел на напад со дрон во август 2022 година. Оттогаш, воздушната одбрана на Крим се активира редовно. Шефот на окупацијата на полуостровот, Сергеј Аксјонов, рече дека нападите со беспилотни летала се „главна закана“ во областа.
Украинскиот Генералштаб во меѓувреме објави дека Русија денеска извршила десетици воздушни и ракетни напади, од кои многу биле насочени кон цивилната инфраструктура во Краматорск, Запорожје и Керсон. Во текот на ноќта на многу локации низ државата се слушнаа сирени за воздушен напад. Русија врши интензивни воздушни напади врз енергетскиот систем на Украина од октомври, предизвикувајќи големи прекини на струја и недостиг на греење и вода. Покрај тоа, украинската страна објави дека имало борби во неколку области на делумно окупираните источни региони Доњецк и Луганск.