Министерот за надворешни работи Бујар Османи денеска и утре во Букурешт ќе учествува на НАТО состанокот на Северно-атлантскиот совет, на ниво на министри за надворешни работи. Во фокусот на разговорите на НАТО Министерскиот состанок, како што соопшти МНР, ќе бидат актуелните безбедносни состојби, ситуацијата во Украина и политичката и практична поддршка од страна на земјите – членки. Воедно, ќе стане збор и за зајакнување на индивидуалната и колективна отпорност на земјите членки наспроти долгорочните предизвици со кои се соочува Алијансата.
Столтенберг: НАТО нема да отстапи, туку ќе продолжи да ја поддржува Украина
Сојузниците ќе се осврнат и врз стратешкото значење на Западен Балкан и Црноморскиот регион за НАТО и во таа насока на потребата од зајакнатата поддршка за земјите партнери изложени во поголем ризик, се вели во соопштението. Одржувањето на состанокот, кој вообичаено е во Брисел испраќа јасна порака: НАТО е многу присутен во регион близок до војната во Украина. На министрите за надворешни работи на алијансата ќе им се придружат и нивните шведски и фински колеги, вторите само како поканети, бидејќи Турција и Унгарија сè уште не ги ратификувале своите апликации за членство.