Копретседавачот во македонско-бугарската комисија за историски и образовни прашања, Драги Ѓоргиев изјави дека не го прочитал и не знае што содржи францускиот предлог за одблокирање на евроинтегративниот процес на Македонија и притоа демантираше одредени информации во медиумите.
„Апсолутно не е точно она што е наведено во некои медиуми со она што е усвоено од страна на самата Комисија за заедничко честување на цар Самуил. Исто така, Комисијата никогаш не усогласувала текстови за да бидат тие ставени на различни спомен обележја, споменици или тврдини. Комисијата усвојува заеднички текстови за заедничко чествување на одредени личности и тие личности се познати и веќе два текста од нив се објавени во јавноста и тоа е она што го има направено Комисијата“, рече Ѓоргиев.
Тој напомена дека комисијата ниту дава дозвола да бидат тие објавени на различни спомен обележја, ниту е тоа работата на комисијата. Како што рече, текстовите на комисијата се за заедничко чествување а не за спомен обележја.
„Постои текст за заедничко чествување на цар Самуил кој е усвоен во 2019 година и вчера или завчера веќе беше објавен во дел од медиумите, а пред неколку месеци на една од средбите усвоен е и предлог препорака до владите како таа држава да биде претставена во учебниците по историја. Тие два текста немаат апсолутно ништо заедничко со она што е за жал објавено во некои медиуми и се пренесени во наши медиуми, без и малку критички да бидат анализирани“, додаде Ѓоргиев.
Тој уште еднаш повтори дека работата на историската комисија не може да биде дел од процесот на политичките преговори. Претходно македонскиот тим на комисијата испрати соопштение во кое реагираше за пишувањата во меидумите.
„Повторно, како и секогаш кога политичките односи меѓу Северна Македонија и Бугарија се влошуваат или се наоѓаат пред голем предизвик да се надминат анахроните и апсурдни барања на официјална Софија, работата на Комисијата и членовите од македонска страна е предмет на злоупотреба од страна на најодговорните чинители во двете држави, политичарите (како од власта, така и од опозицијата), стручната јавност, како и од страна на голем дел од медиумите со нивното непрофесионално известување“, беше наведено во соопштението.
Воедно оттаму апелираат прашањата кои се однесуваат на работата на комисијата од македонска страна да бидат проверувани, а за прашањата во однос на тоа каква ќе биде улогата на Комисијата во евентуални нови протоколи меѓу двете земји ќе се изјаснат доколку тие бидат официјално усвоени од Владите на двете земји.